د مالیې پخواني وزیر او یو شمیر پخوانیو لوړ پوړو چارواکو “د افغانستان د نجات حرکت” په نوم ګوند جوړ او پرانسیت.
دوی په پرونۍ پرانیسته کې وویل چې د دوی اصلي هدف د ٤٠ کلن بحران څخه راوتل او د افغانستان ثبات دی.
ددې ګوند مشر د ماليې پخوانی وزير عمر زاخيلوال دی.
هغه په هېواد کې د روانو حالاتو نه نارضايتي څرګنده کړه او وه یې ویل، چې اوس مهال متحده ایالات ، روسیه ، ایران ، پاکستان او “حتی د قطر په څېر یو کوچنی هېواد” هم د افغانستان د خلکو په برخلیک باندې غږېږي؛ په داسي حال کې چې خپله افغانان دا وړتيا او توانې لري، چې په خپله خپل منځي ستونزې هواري کړي.
ښاغلي زاخېلوال د متحد جبهو او ملي یووالي پر رامنځته کیدو ټینګار وکړ او زیاته یې کړه، چې باید سوله او ثبات د افغانانو لومړيتوب وګرځي، او اوسني بحران څخه د وتلو لپاره یوه ملي ، مؤثره او معتبره تګلاره رامنځته کړي.
عمر زاخېلوال وویل، چې هغه نه غواړي اوسنی نظام او جوړښت سقوط وکړي ، خو که چيري د سولې په راتګ کې خنډ ونه ګرځي.
“جعفر مهدوي” د دې حرکت يو غړي په افغانستان کې د سولې لپاره د امریکا د متحده ایالاتو د پلان او د “انتقالي سولې حکومت” د جوړولو ملاتړ وکړ.
هغه زياده کړه: ویل کېږي چې د افغانستان ولسمشر “محمد اشرف غني” به د استانبول د سولې په ناسته کې په شپږو میاشتو کې د ټاکنو لپاره پلان وړاندې کړي.
خو ښاغلي مهدوي وویل، چې دا پلان “نه د افغانستان لپاره ښه دی او نه هم د اوسني سولې پروسې لپاره.”
د پوهنې پخواني وزیر “فاروق وردګ” د دې حرکت بل غړی دی، هغه وايي دوی به له هر حرکت او هڅې سره همکاري کوي، چې د هغه په وینا واقعا” د سولې راوستو لپاره کار کوي.
