وسله والو طالبانو په کابل کې هغه خبریالان وهلي، چې د خپلواکۍ ورځې د لمانځنې په موخه د ښاریانو د راټولېدنې خبري پوښښ لپاره ورغلي وو.
د ملي راډیو ټلویزون خبریال سیدعمر سهار د هندوستان له ZeeNews تلویزون سره په مرکه کې وویل، چې طالبانو ورسره بده رویه کړې، کمره مېن یې وهلی، د مرګ ګواښونه ورته شوي او کمره یې ترې اخیستې ده.
نوموړي زیاته کړې، چې د طالبانو دا چلند یې غږ نه شي چوپ کولای او دوی به د مبارزې لپاره خپلو هڅو ته دوام ورکړي.
هیره دې نه وي، چې تېره ورځ په جلال ښار کې د پژواک اژانس او اریانا ټلویزیون خبریالان هم د طالبانو له لوري وهل شوې وه.
د طالبانو له لوري د خبریالانو د وهلو راپورونه په داسې مهال خپرېږي، چې تر دې وړاندې د طالبانو ویاند ذبیح الله مجاهد ډاډ ورکړی و، چې د خبریالانو او رسنیو خوندیتوب ته به ځانګړې پاملرنه کوي.
په ورته وخت کې، د جي ۷ هېوادونو په غونډه کې د کاناډا، فرانسې، جرمني، ایټالیا، جاپان او بریټانیا د بهرنیو چارو وزیرانو او د اروپايي ټولنې استازو د ټولو هغو کسانو او خبریالانو په خوندي تګ ټینګار وکړ چې غواړي له افغانستان څخه ووځي.
په دې غونده کې د دغو هیوادونو د بهرنیو چارو وزیرانو ټینګار وکړ چې له طالبانو سره به د نړیوالې ټولنې اړیکې د هغوی کړنو پورې اړه ولري نه د هغوی د خبرو پورې.
