ښايي نړیوال بانک د افغانستان ۶۰۰ میلیونه ډالر کنګل شوې شتمني ازاده کړي.
رویټرز خبري اژانس وایي د نړیوال بانک مدیره هیت یو وړاندیز لاسلیک کړی چې له مخې یې ددغه بانک په امانتي صندوق کې د افغانستان میلیونونه ډالر کنګل شوې شتمني ازادېږي.
راپورونه وایي چې دغه پیسې به د بیا رغونې وجهي صندوق تمویل کوونکو ته په افغانستان کې د مرستو په موخه ورکول کېږي.
نړیوال بانک ویلي چې دا شپږ سوه میلیونه ډالر به په افغانستان کې د پوهنې، افغان کورنیو او ټولنیزو مسایلو لپاره کارول کېږي.
ددغه پیسو د ازادولو په اړه به وروستۍ پرېکړه د راتلونکې مارچ میاشتې په لومړیو کې اعلانېږي.
په کابل کې د نوي حکومت په راتګ سره امریکا په نړیوالو بانکونو کې د افغانستان میلیاردونه ډالر شتمني کنګل کړه، چې تر دې دمه یې له یادو شتمنیو د افغانستان پر وړاندې د فشار په توګه کار اخیستی دی.
