ملګري ملتونه وایي افغانستان ته د مرستو راټولولو په لټه کې دي.
په افغانستان کې د ملګرو ملتونو د مرستندویه دفتر مشرې دیبورا لاینز د افغانستان اقتصاد په نامه کنفرانس کې د خبرو پر مهال وویل، چې ملګري ملتونه له مرستندویه هېوادونو سره په اړیکه کې دي او هڅه کوي د لا ډېرو مرستو د جذب او کنګل شوو شتمنیو د ازادولو په اړه بحثونه دوام وکړي.
د لاینز په خبره افغانستان له خورا بد اقتصادي وضعیت سره مخ دي او یوازې په دولتي عایداتو د افغانستان ټولې اړتیاوې نه شي پوره کولی او د نړیوالو پراخو مرستو ته اړتیا لري.
د لاینز په خبره ملګري ملتونه هڅه کوي د عامو افغانانو لاسنیوی وکړي او له یوه پراخ بشري ناورین مخنیوی وکړي چې په همدې لړ کې یې د میلیاردونو ډالرو مرستې غوښتنه کړې ده.
لاینز یو ځل بیا پر نوي حکومت غږ وکړ چې ښځو ته د کار زمینه برابره کړي، ځکه دوی د افغانستان نیم نفوس تشکیلوي او د افغانستان په اقتصادي وده کې مهمه ونډه لري.
په ورته وخت کې امریکا وایي له افغانستان سره د مرستو دوام ته ژمن دي.
د امریکا د بهرنیو چارو وزیر انتوني بلینکن په تازه ټوېټ پیغامونو کې ویلي چې دوی په دې سختو شرایطو کې له افغانانو سره بشردوستانه مرستو ته ژمن دي او له افغانستان سره د کرونا واکسین د ورکړې شوې ژمنه هم عملي کوي.
بلینکن وایي چې دوی له افغانستان سره د یو میلیون دوزه واکسین د ورکړې ژمنه کړې وه او هڅه کوي چې د کو واکس پروګرام له لارې پاتې واکسین هم افغانستان ته ولېږل شي.
امریکا داسې مهال دغه څرګندونې کوي چې په وروستیو کې د افغان شتمنیو د کنګل کولو له امله د نړیوالو له سخت فشار سره مخ ده.
خو امریکا وايي د دوی بندیزونو بشردوستانه خدماتو او مرستو ته هېڅ راز خنډ نه دی جوړ کړی او کوم بنسټونه چې په دې برخه کې ستونزه لري دوی یې د ستونزو حل کولو ته ژمن دي.
