د روغتیا نړیوال سازمان وایي ښايي افغانستان ته د کرونا ضد ځانګړي شوي واکسین په وخت و نه رسېږي.
ټاکل شوې وه چې تر مې میاشتې پورې د روغتیا نړیوال سازمان افغانستان ته شاوخوا درې میلیونه ډوزه کرونا ضد واکسین ورکړي، خو اوس تازه دغه سازمان په خپلو څرګندونو کې ویلي چې ښايي د واکسینو ورکړه ان تر اګسټ میاشتې پورې وځنډېږي.
د روغتیا نړیوال سازمان د معلوماتو له مخې دوی هڅه کوي ټولو هېوادونو ته په عادلانه توګه د واکسینو د وېش لړۍ ته ادامه ورکړي.
بلخوا افغان حکومت بیا له مرستندویه هېوادونو غوښتي چې د کرونا وبا د نوې څپې په کنټرول کې ورسره مرسته وکړي.
د امریکا د بهرنیو چارو وزارت هم د افغانستان پر ګاونډیو هېوادونو غږ کړی چې له دغه هېواد سره د کرونا وبا د مخنیوي په برخه کې همکاري وکړي او د مرستو لپاره خپلې پولې پرانیزي.
د یادونې ده چې تېره ورځ ولسمشر غني وویل، چې ډېر ژر به له چین څخه د کرونا ضد اووه سوه زره ډوزه واکسین افغانستان ته را ورسېږي.
نوموړي زیاته کړې چې په کور دننه او له بهر څخه د اکسیجن اړتیا پوره کولو لپاره هم لازم اقدامات شوي دي او په کمه موده کې به دغې ستونزې ته رسېدګي وشي.
نوموړي چې د عامي روغتیا وزارت له مسوولینو سره یې د کرونا د دریمې څپې مدیریت په اړه خبرې کولې وویل، د روغتیا وزارت ترڅنګ ټول باید په مسوولیت منلو کې شریک اوسي او دغه راز دولت د ډاکترانو حیثیت، عزت او وقار ساتلو ته ژمن دی او له دوی سره ناوړه چلند کوونکي به تر عدلي او قضایي تعقیب لاندې ونیول شي.
