ملګري ملتونه وایي په افغانستان کې په تعلیمي برخه کې خپلو مرستو او همکاریو ته ژمن دي.
په کابل کې د ملګرو ملتونو د بشري مرستو د همغږې کوونکې ادارې مشر او دغه راز په کابل کې د یونسیف مشر د طالبانو د تعلیمي کمیسیون له غړو سره کتلي دي.
یونما په خپره کړې اعلامیه کې وایي چې په دې لیدنه کې د نجونو او هلکانو د ښوونځیو پر اوسني وضعیت او په دې برخه کې پر همکاریو او مرستو خبرې شوې دي.
د ملګرو متلونو یادو دواړو ادارو ژمنه کړې چې له افغانستان سره خپلو مرستو ته ادامه ورکوي او په تعلیمي برخه کې د نجونو او هلکانو د زده کړو په بهیر کې پر خپلو ژمنو ولاړ دي.
دوی همدا راز ویلي چې د نجونو او هلکانو لپاره به د زده کړو فرصتونه لا پراخ او دا بهیر به منظم کړل شي.
په ورته وخت کې د ملګرو ملتونو د بشري حقونو شورا د افغانستان په اړه بېړنۍ غونډه رابولي.
سرچینه وایي چې په افغانستان کې د رامنځ ته شوي وضعیت له امله د بشري حقونو شورا اړ ده چې په دغه هېواد کې د بشري حقونو د وضعیت څارنه وکړي.
د راپورونو له مخې په دغه غونډه کې به په افغانستان کې د بشري حقونو د څار د څرنګوالي لپاره یوه طرحه جوړېږي او دغه راز ښایي یو پلاوی جوړ شي چې هغه به د افغانستان وضعیت څاري.
دوی همدا راز د ملګرو ملتونو له عمومي منشي انتونیو ګوتریش غواړي چې په افغانستان کې د بشري حقونو پر وضعیت مستقیمه څارنه ولري.
د بشري حقونو شورا وایي چې د جګړو او په افغانستان کې د طالبانو له واکمنېدو سره سم د بشري حقونو په تېره د ښځينه وو او اقلیتونو د حقونو د نقض احتمال شته دی.
خو طالبانو بیا ویلي چې د اسلامي شریعیت په چوکاټ کې ټولو بشري حقونو ته ژمن دي.
