په قزاقستان کې سلګونه کسان نور هم په نارامیو کې د لاس لرلو په تور نیول شوي دي.
د راپورونو له مخې تازه په تازه شاوخوا ۱۶۰۰ کسان د حکومتي ځواکونو له لوري نیول شوي چې په دې توګه د ټولو نیول شوو کسانو شمېر ۱۲ زره ته رسېږي.
حکومت همدا راز په دې لاریونونو کې د جنایتونو د څېړلو لپاره شاوخوا ۴۰۰ قضیې پرانیستې دي.
قزاقي چارواکو ویلي دا له روسیې د ازادۍ تر اخیستلو وروسته په دغه هېواد کې د نارامۍ تر ټولو ستره څپه وه چې دوی یې په کابو کولو بریالي شوي دي.
حکومت وايي لا هم د ترهګرو او په دې لاریونونو کې د ښکېلو کسانو د نیولو عملیات روان دي.
د یادونې ده چې تېره ورځ
د قزاقستان حکومت ویلي چې په دغه هېواد کې وضعیت آرام شوی او راغلي سرتېري به په راتلونکو دوو ورځو کې بېرته ووځي.
د قزاقستان ولسمشر قاسم توقایف په تازه څرګندونو کې ویلي، چې نوی حکومت او نوی لومړی وزیر یې تعین کړی دی او دوی ته لومړی سپارل شوی کار دا دی، چې پر اقتصادي مسایلو کتنه وکړي، نرخونه کنټرول کړي او د اسعارو بیې تنظیم کړي.
هغه همدا راز ویلي چې په دغه هېواد کې دمګړی وضعیت ارام شوی دی او د روسیې په مشرۍ د ګڼو هېوادونو راغلي سرتېري به د پنجشنبې په ورځ بېرته تګ پیل کړي.
هغه زیاته کړې چې دغه سرتېري دلته نه پاتې کېږي او په راتلونکو لسو ورځو کې به په بشپړه توګه وځي.
دا څرګندونې د امریکا د هغه ادعا په ځواب کې کېږي چې ویل یې روسي عسکر د تل لپاره د پاتې کېدو په موخه قزاقستان ته راغلي دي.
