د پخواني ولسمشر محمد اشرف غني لومړی مرستیال امرالله صالح وایي، د افغان سولې لپاره د امریکا پخوانی ځانګړی استازی زلمی خلیلزاد له افغانانو سره د شوې لویې دوکې اصلي طراح و.
نوموړي پر خپله ټوېټر پاڼه لیکلي، خلیلزاد د افغانستان له جمهوري نظام سره د قربانۍ د بزې په څېر چلن کاوه او تر هغې یې ورسره لباسي همدردي کوله چې چاړه د جمهوریت تر مرۍ ورسېده.
صالح وړاندې لیکلي، زلمی خلیلزاد هڅه کوي پړه پر نورو ور واچوي، خو نشي کولای چې په مرکو د خپلې ناکامۍ بوی ختم کړي.
صالح زیاته کړې، زلمی خلیلزاد باید د دې لویې تباهۍ پړه ومني، خو برعکس لا هم هڅه کوي چې افغانان ملامت ثابت کړي او د دې ولس له بېچارګۍ ناړه ګټه پورته کوي.
امرالله صالح دا څرګندونې د زلمي خلیلزاد د هغې مرکې په غبرګون کې کړې دي چې تازه یې له ‘کارنېګي’ څېړنیز بنسټ سره کړې.
زلمي خلیلزاد په یوه انلاین غونډه کې د خبرو پر مهال ویلي، چې امریکا له لومړي سره په افغانستان کې د ټاکنو د ترسره کېدو مخالفه وه، خو له فساده په ډکو ټاکنو کې اشرف غني ځان د افغانستان ولسمشر اعلان کړ او د نړیوالو یوې مشورې ته یې هم ارزښت ور نه کړ.
خلیلزاد وایي په ځلونو یې هغه ته وویل، چې باید له طالبانو سره د ګډ حکومت لپاره کار وکړي، موقت حکومت دې جوړ شي، جګړې دې ودرول شي او اجازه دې ورکړل شي چې امریکايي عسکر له افغانستان ووځي.
خلیلزاد زیاتوي چې غني سرتمبه و، پر خپلو غلطو او ناسمو معلوماتو یې ټینګار کاوه، ځان یې د جګړې ګټونکی باله او په پایله کې یې د افغانستان حکومت ټوټې کړ.
نوموړي همدا راز د ولسمشر غني په کړۍ کې د پراخ فساد، د افغان چارواکو نه ژمنتیا او د جګړې په لومړۍ کرښه کې پوځيانو ته نه پاملرنه ددې ماتې نور ستر لاملونه بولي.
خلیلزاد وایي چې اشرف غني په خپلو ناسمو سیاستونو، بېځایه ټينګارونو او د چا مشورې د نه منلو له امله د میلیونونه انسانانو په ژوند لوبې وکړې او هر څه یې برباد کړل.
خلیلزاد د افغانستان د اوسني وضعیت ټول مسوولیت پر ولسمشر اشرف غني اچوي او په خبره یې د هغه تګ ددې سبب شو چې د افغانستان پوځ وپاشل شي او اوسنی نامعلوم وضعیت رامنځ ته شي.
خلیلزاد ویل تر تګ یوه ورځ مخکې له ولسمشر غني سره د سوله ییز لېږد او جګړې نه کولو په اړه خبرې شوې وي، خو هغه له هېواد ووت.
زلمی خلیلزاد په تېرو څلوېښتو کلونو کې د افغانستان په ناورین کې د امریکا له لوري په یو ډول نه یو ډول ښکېل کس و، چې په دې موده کې یې بېل ماموریتونه ترسره کړي دي.
هغه ځان په خپلو چارو کې بریالی بولي خو په اړه یې د رسنیو او عامو وګړو قضاتونه توپير کوي.
