سعودي عربستان وایي طالبانو ته په کار ده چې له جګړو لاس په سر شي او د سولې لار خپله کړي.
د افغانستان لپاره د سعودي عربستان سفیر د بهرنیو چارو له وزیر حنیف اتمر سره کتلي دي او ډاډ یې ورکړی چې دوی له افغان سولې سره همکارۍ او مرستو ته تیار دي.
هغه زیاته کړې، چې په افغانستان کې تاوتریخوالی ډېر شوی دی او دې مسئلې د سعودي عربستان اندېښنه هم پارولې ده نو له همدې امله پر طالبانو غږ کوي چې له جګړو لاس په سر شي او له افغان حکومت سره مخامخ خبرو ته ادامه ورکړي.
عربستان همدا راز ډاډ ورکړی چې دوی به د افغان سولې د پرمختګونو لپاره د نړیوالو کنفرانسونو او غونډو جوړولو ته هم ادامه ورکړي.
افغان حکومت هم د سولې په برخه کې د عربستان له دایمي همکاریو مننه کړې ده او دغه هېواد یې د افغانستان ښه ملګری بللی دی.
په ورته وخت کې پاکستان او عربستان پر افغانستان او کشمیر خبرې کړې دي.
د سعودي عربستان د بهرنیو چارو وزیر په یوه ورځني سفر پاکستان ته تللی او په دغه هېواد کې یې له خپل پاکستاني سیال شاه محمود قریشي سره کتلي دي.
په دې لیدنه کې د بېلو نورو مسایلو تر څنګ تر ټولو ډېر بحث د افغانستان پر وضعیت شوی دی.
شاه محمود قریشي په یوه خبري غونډه کې ویلي چې افغانستان کې وضعیت بدلېدونکی دی، جګړه شدیده شوې ده نو له همدې امله سعودي عربستان او پاکستان په دې منځ کې پر شته خنډونو او فرصتونو خبرې کړې دي.
قریشي په دې اړه تر دې ډېر جزیات نه دي ورکړي.
