په امریکا کې د کرونا وبا د نوې بڼې اومېکرون ډېرې نوې پېښې ثبت شوي دي.
په ټوله نړۍ کې د اومېکرون د مخنیوي لپاره هېوادونو یو وار بیا محدودیتونه پيل کړي دي.
اومېکرون د کرونا وبا نوې بڼه ده چې له افریقايي هېوادونو په چټکۍ نورو سیمو ته خپره شوې او اوس د امریکا په څلورو ایالتونو کې یو شمېر خلک پرې اخته شوي.
د امریکا روغتیایي چارواکو ویلي چې اته داسې ناروغان په اومېکرون اخته شوي چې مخکې د کرونا ویروس ضد واکسین شوي وو.
د امریکا ولسمشر جو بایډن پرون د نړیوالو مسافرینو لپاره نوي اقدامات اعلان کړل او ژمنه یې کړې چې امریکایان به ډېر ژر په کور کې د کرونا وبا وړیا ازموینې ته لاسرسی پيدا کړي.
اخوا په هند کې هم چې مخکې کرونا سخت ځپلی د اومېکرون بڼې یوه پېښه پرون ثبت شوې ده.
