په متحده عربي اماراتو کې د افغانستان او زیمبابوې د کرکټ ملي لوبډلو ترمنځ د دوه ۲۰ اوریزه کرکټ سیالیو لړۍ د افغانستان په بریا سره پای ته ورسیدې.
د دواړو لوبډلو ترمنځ د کرکټ دغه ۲۰ اوریزه سیالۍ د روانې فیبرورۍ میاشتې په ۵ مه نېټه پیل شوې، چې د لمړۍ لوبې وروسته په دویمه سیالۍ کې هم افغان لوبډلې د زیمبابوې لوبډلې څخه بریا خپله کړه.
په سیالۍ کې افغان کرکټ ملي لوبډلې په لمړۍ توپ وهنې په ټاکلو ۲۰ اورنو کې د محمد نبي د ۴۵، کریم صادق د ۲۸، اضغر ستانکزي د ۲۷ او نجیب الله ځدران د ۲۴ منډو جوړولو سره زیمبابوې لوبډلې ته د ۱۵۹ منډو هدف ورکړ، خو زیمبابوې لوبډله د هدف په لاسته راوړلو کې پاتې رغله او لوبه یې د ۱۷ منډو په توپیر افغان لوبډلې ته وبایلله.
له دې وړاندې په لمړۍ سیالۍ کې هم افغانستان د زیمبابوې لوبډلې ته په ۵ ویکټو سره ماتې ورکړې وه.
په دواړو سیالیو کې محمد نبي عیسی خیل د ښې لوبې په ترسره کولو سره د لوبو غوره لوبغاړی وټاکل شو. نوموړي په لمړۍ سیالۍ کې د ۴۰ ناسوځیدلو منډو ترڅنګ یوه ویکټ او په دویمه سیالۍ کې د ۴۵ منډو جوړلو وروسته هم یوه ویکټ ترلاسه کړه، چې په دواړو لوبو کې یې تر نور لوبغاړو ډیرې ۹۵ منډې جوړې کړې.
په وروستیو دوه لوبو سره افغان کرکټ ملي لوبډلې د زیمبابوې خلاف د ۷ پرلپسې ۲۰ اوریزه کرکټ سیالیو کې د بریا خپلولو ترڅنګ د کرکټ نړیوالې شورا د درجه بندۍ په لیست کې سریلنکا د ۸ مقام څخه ۹ م مقام ته ګوزار کړه.
د زیمبابوې خلاف په دویمې وروستۍ ۲۰ اوریزه کرکټ سیالۍ کې د بریا په خپلولو افغان لوبډله د ۸۸ امتیازونو په درلودلو سره د کرکټ نړیوالې شورا په درجه بندۍ کې ۸ مقام ته ورسیده.
د یادونې وړ ده، چې له دې وروسته به د واړو کرکټ ملي لوبډلو ترمنځ د ۵ پنځوس اوریزه کرکټ سیالیو لړۍ د راتلونکې جمعې په ورځ په متحده عربي اماراتو کې پیل شي، چې د هرې لوبې ګټل د کرکټ نړیوالې شورا د لوبډلو په رینکینګ یا درجه بندۍ کې خورا زیات تاثیر لري.
د نړیوالو لوبغاړو مبارکي؛
هندي ویرات کوهلي او محمد شمي افغانستان ته مبارکي ورکړه !
د هندوستان د کرکټ ملي لوبډلې لوبغاړو ویرات کوهلي او تیز بالر محمد شمي د زیمبابوې خلاف په دوه مسلسل سیالیو کې د افغان لوبډلې د بریا په خپلولو او په نړیواله درجه بندۍ کې اتم مقام ته د رسیدو مبارکې ورکړه.
د کرکټ نړیوالې شورا د ټویټر اکاونټ څخه پرون شپه د افغانستان د کرکټ ملي لوبډلې د بریا او ۸ م مقام خپلولو انځور خپور شوی، چې هندي لوبغاړو محمد شمي
افغان لوبډلې ته مبارکې وویله او د لوبډلې ستاینه یې کړې ده.
هېره دې نه وي، چې له دې وروسته به د واړو کرکټ ملي لوبډلو ترمنځ د ۵ پنځوس اوریزه کرکټ سیالیو لړۍ هم د راتلونکې جمعې په ورځ په متحده عربي اماراتو کې پیل شي، چې د هرې لوبې ګټل د لوبډلو په رینکینګ یا مخکې تګ کې خورا زیات تاثیر لري.
