طالبانو تېره ورځ د کندهار پر هوایي ډګر توغندویي برید کړی دی او د ځاني او مالي زیانونو اړولو ادعا یې کړې ده.
سي ان ان د تېرې ورځې برید ته په اشارې ویلي چې طالبانو په تېره میاشت کې دوه ځلې هغه ځایونه په نښه کړي دي چې د متحده ایالاتو نظامي پرسونل او د سي ای اې مخفي مامورین په کې اوسېږي.
راپور کې راغلي چې طالبان په دې ډول بریدونو سره تاوان کوي ځکه چې دا ډول بریدونه به د بایډن د وتلو پلان لا پېچلی کړي.
راپور زیاته کړې، که چېرته طالبان غواړي چې امریکایي سرتېري له افغانستان څخه ووځي نو باید تاوتریخوالی کم کړي او له ورته بریدونو ډډه وکړي.
د راپور وروستۍ برخه کې راغلي چې دا ډول بریدونه امریکایي لوري ته دا پلمه په لاس ورکوي چې خپل ځواکونه د اوږدې مودې لپاره په دغه هېواد کې وساتي.
راپور کې دغه راز د امریکایي سرتېرو د حضور اوږدېدو په اړه د بایډن څرګندونو په اشارې ټینګار شوی دی چې امریکایي سرتېري باید خپلې دفاع ته په کلکه تیاری ونیسي.
د یادونې ده چې د امریکا دفاع وزارت د کندهار پر هوایي ډګر پرونی برید غندلی او ویلي یې دي چې کېدای شي دغه برید د تاوتریخوالي د زیاتېدو لامل شي.
طالبانو پرون چهار شنبه پر کندهار هوایي ډګر راکټونه توغولي وو، خو تلفات یې نه درلودل.
د پنتاګون ویاند جان کربي ویلي، چې د طالبانو دغه کړنه د سولې د خبرو د زیانمنېدو لپاره ګواښ دی.
نوموړي ویلي، موږ دغه برید غندو او په دې باور یو چې دغه چاره د طالبانو لخوا د تاوتریخوالي د زیاتېدو پرېکړه ده.
امریکا ویلي، چې که څه هم د کندهار هوایي ډګر د امنیت مسوولیت افغان ځوکونو ته سپارل شوی دی، خو لا هم په دغه هوایي ډګر کې د ناټو او امریکا عسکر مېشت دي.
طالبانو ددغه برید مسوولیت پرغاړه اخیستی دی.
