هند وایي د افغانستان د سولې په مسئله کې د سیمې د هېوادونو همکاري اړینه ده.
د هند د بهرنیو چارو وزیر جي شینکر د اسیا زړه هېوادونو په کنفرانس کې د خبرو پر مهال ویلي چې د سولې په برخه کې د پرمختګ لپاره د دواړو لورو ترمنځ نرمښت ته اړتیا ده او باید مذاکراتو ته ژمنتیا رامنځ ته شي.
د هغه په وینا د مذاکراتو دواړه لوري باید سولې ته ژمنتیا وښيي او دا دې ثابته کړي چې دوی په رښتینې توګه په افغانستان کې سوله غواړي.
د هند د بهرنیو چارو وزیر یو ځل بیا ویلي چې هېواد یې د سولې له روان بهیر هر اړخیز ملاتړ کوي او په دې تمه دی چې په افغانستان او سیمه کې دایمي سوله او ثبات تامین شي.
په ورته وخت کې د تاجکستان ولسمشر امام علي رحمان وایي دوی له ټولو ممکنو لارو له افغان سولې سره مرستې او همکارۍ ته تیار دي.
هغه چې نن یې په دوشنبه کې د اسیا زړه-استانبول بهیر په کنفرانس کې خبرې کولې وویل د تاجکستان ستره هیله په افغانستان کې د سولې او ثبات راتګ دی.
د نوموړي په خبره تاجکستان تیار دی چې له ټولو ممکنو لارو په استفادې د افغانستان د سولې له پروسې سره همکاري وکړي او ددغه بهیر بشپړ ملاتړي دي.
اما علي رحمان همدا راز وویل چې دوی له افغانستان سره د ګډو پروژو عملي کولو ته تیار دی.
هغه ټينګار وکړ چې د سولې په برخه کې دې د ټولو افغانانو غږ واورېدل شي او په دې ټوګه دې دغه هېواد ته دایمي سوله او سوکالي راوستل شي.
رحمان د دواړو هېوادونو ترمنځ د همکاریو پر پراختیا هم ټینګار وکړ او زیاته یې کړه چې د کابل او دوشنبې ترمنځ د تاریخي اړیکو د لا قوت لپاره به هڅه کوي.
نن په پلازمینه دوشنبې کې د افغانستان په اړه د اسیا زړه نهم کنفرانس دی چې تر ډېره به پکې پر افغان سوله او سیمه ییز ثبات بحثونه او خبرې پکې کېږي.
