له ماشومانو د ملګرو ملتونو د ملاتړ ادارې (یونسیف) ویلي چې اروپایي ټولنه د افغان ښوونکو د دوو میاشتو معاشونه ورکوي.
د یادې ادارې په وینا، یونسیف د ۱۹۴ زره دولتي ښوونځیو د ښوونکو د معاشونو ورکړې لپاره بودجه ځانګړې کړې ده او ژمنه یې کړې ده چې ژر به هر ښوونکي ته د میاشتې سل ډالر ورکړي.
د دغې ادارې په وینا، له دې چارې نه یې موخه د افغان ښوونکو ستونزو ته رسېدګي او دغه راز د افغان ماشومانو ملاتړ دی.
د یادونې ده چې پرون د افغانستان لپاره د یونسیف تازه ګومارل شوي استازي د افغان ماشومانو پر وضعیت اندېښنه څرګنده کړې او له کړاونو څخه د هغوی د ایستلو کلکه ژمنه یې کړې ده.
په ورته وخت کې پوهنې وزارت وایي چې ډېر ژر به د نجونو او هلکانو ښوونځي د زده کوونکو پر مخ بېرته پرانیستل شي.
د یاد وزارت ویاند عزیز احمد ریان ویلي چې پوهنې وزارت د ښوونځیو د بیا پرانیستل کېدو په برخه کې جدي دی او ټول زده کوونکي به په یو ډول له تعلیمي نصاب څخه برخمن شي.
ریان زیاته کړې ده چې دا وزارت د تعلیمي نصاب د بدلون هیڅ ډول پلان نه لري خو په راتلونکو کلونو کې به پر دې موضوع باندې کار وکړي.
د یادونې ده چې واک ته د ا.ا تر رسېدو وروسته ټول ښوونځي د زده کوونکو پر مخ تړل شوي دي او دې چارې ټول افغانان له سختو اندېښنو سره مخ کړي دي.
