د پاکستاني طالبانو تحریک ویاند محمد خراساني وایي چې د دوی او پاکستاني حکومت تر منځ د مذاکراتو په تړاو خپاره شوي خبرونه حقیقت نه لري.
هغه زیاته کړې ده چې د دوی هدف په پاکستان کې اسلامي نظام دی او څو پورې چې یې یاد هدف نه وي تر لاسه کړی د پاکستاني ادارو پر ضد به خپلې وسله والې مبارزې ته دوام ورکړي.
نوموړي ټینګار کړی دی چې دوی له پاکستاني دولت سره د خبرو لپاره څه نه لري.
هغه دا څرګندونې وروسته تر هغه کوي چې په دې وروستیو کې داسې راپورونه ورکړل شوي دي چې ګوندې د ټيټيپي او پاکستاني حکومت ترمنځ د روغې جوړې پټو خبرو کې مهم پرمختګونه شوي دي.
له یادو خبرو څخه باخبره سرچینو رسنیو ته ویلي چې د پاکستان حکومت د مهمو طالب مشرانو په ګډون د هغوی د ۱۰۲ تنه زندانیانو پر خوشې کېدو رضا شوی دی او ډېر ژر به دغه زندانیان را خوشې کړي.
د دي نیوز په نامه د یوې ورځپاڼې خبریال ویلي چې ده د دغو مذاکراتو له ګډونوالو سره خبرې کړې دي او هغوی منلې ده چې د پاکستان د امنیتي ادارو د غړو او پاکستاني طالبانو ترمنځ پیل شویو خبرو کې پرمختګونه شوي دي.
هغه ویلي چې دا خبرې ځکه پټې ساتل شوې دي چې هسې نه څوک یې د ګډوډولو هڅه وکړي.
