د افغانستان د بهرنیو چارو وزارت سرپرست مولوي امیرخان متقي یو ځل بیا پر نړۍ ځانګړې توګه پر امریکا غږ کړی دی چې د افغانستان مالي پانګه ازاده کړي.
نوموړي په اسلام اباد کې د اسلامي همکاریو سازمان غونډې ته ویلي چې امریکا په وروستیو بندیزونو سره په ښکاره د افغانانو بشري حقونه نقضوي او له ټول افغان ملت سره دښمني کوي.
متقي د غونډې پر ګډونوالو غږ کړی دی چې له امریکایي چارواکو غوښتنه وکړي چې د افغان ولس ځورول او افغان حکومت کمزوري کول د هېچا په ګټه نه دي.
هغه څرګنده کړې چې دا کار د دواړو هېوادونو د اړيکو له بهترۍ سره مرسته نه کوي، بلکې د امریکا حیثیت ته زيان رسوي او د کډوالۍ لړۍ پراخوي چې منفي اثرات یې ټولی نړۍ ته رسېږي.
نوموړي دغه راز د غونډې له ګډونوالو غوښتنه کړې ده چې په کابل کې خپل سفارتونه بېرته پرانیزي.
هغه دغه راز ویلي، چې ا.ا به د افغانستان د کړکېچ عادلانه حل لارې په موندلو کې د اسلامي هېوادونو مشورې، غوښتنې او اندېښنې پر ورین تندي ومني.
متقي ټینګار کړی دی چې ا.ا د افغانانو د استازي په توګه، بشري حقونه، د ښځو حقونه او په دولت کې د ټولنې د مختلفو اقشارو د شخصیتونه مشارکت خپل مسوولیت بولي او په دې برخه کې شویو وعدو ته ژمن دی.
