د پاکستان د بهرنیو چارو وزیر شاه محمود قریشي ویلي چې هېواد یې له افغانستان سره د سولې ټینګېدو برخه کې همکارۍ ته چمتو دی.
قریشي دغه څرګندونې نن د انتالیا ناستې په څنډه کې د مصالحې شورا له رییس ډاکتر عبدالله عبدالله سره د لیدنې پرمهال کړې دي.
قریشي ټینګار کړی چې پاکستان په افغانستان کې د سیاسي حل لارې غوښتونکی دی او په وینا یې دغه هېواد په هېڅ صورت د پوځي حل لارې او د طالبانو د پوځي تسلط طرفدار نه دی.
د ملي مصالحې عالي شورا د معلوماتو په اساس قریشي ویلي چې د سیمې په اړه د پاکستان سیاست تغیر کړی دی او په وینا په سیمه کې اقتصادي ګټو ته ګوري او د افغانستان د سولې او ثبات سره هم مرسته کوي.
عبدالله د سولې برخه کې د پاکستان پر همکارۍ ټینګار کړی او په دې برخه کې د هغه هېواد رول مهم بللی دی.
یادونې ده چې عبدالله د انټالیا ډيپلوماسي مجمع په څنډه کې د ایران د بهرنیو چارو له وزیر جواد ظریف سره هم کتلي دي.
په دې کتنه کې جواد ظریف په افغانستان کې د سولې له هڅو ملاتړ کړی او ویلي یې دي چې د افغانستان ستونزې نظامي حل نه لري.
نوموړي ویلي، چې سولې ته په رسېدو کې له افغان حکومت سره خپلو مرستو ته دوام ورکوي.
