لیکنه: ملیحه ناصري
د « بریالیتوب پیل» کتاب روبېن شرما لیکلی او ګلاب بهار پښتو کړی دی. روبېن شرما هغه لیکوال دی چې ډېری وخت داسې کتابونه خلکو ته وړاندې کوي چې ذهناً د مثبت اندۍ پر لوري بلنه ورکوي او هڅوونکي دي. دی هندي الاصله کاناډايي لیکوال دی. که څوک یې نوی له نوم سره اشنا شي، داسې ورته ښکاري چې د هند دی؛ خو چې انځور یې وویني، بیا پوهېږي چې نه، کاناډايي هندي الاصله دی.
روبېن شرما اکثراً هڅوونکي او د رهبریت اړوند سیمینارونه جوړوي چې ډېر ګډونوال لري، دی په خپلو کتابونو کې ځينې وخت د متن په مینځ کې وايي چې ګډونوال یې له خبرو اغېزمن شوي او په ژوند کې یې پر مثبت لوري کاږلي دي. بل یې تمرکز پر هغو خبرو کړی چې د غونډو په ترڅ کې یا د وړاندیز په بڼه خلکو ترې غوښتي چې پر همغو موضوعاتو دوی ته لیکنې وکړي.
د کتاب پښتۍ ښکلې ډيزاین شوې چې د کتاب منځپانګې ته د بلنې لپاره یوه وړوکې غونډله( جمله) پرې لیکل شوې او د لیکوال پېژند په موخه د روبېن انځور پرې ایستل شوی دی.
پیل یې د ژباړونکي« ګلاب بهار» په خبرو شوی چې د لیکوال په اړه یې مالومات وړاندې کړي او بیا د کتاب پر منځپانګه راڅرخېدلی.
د شرما دا کتاب هم د نورو کتابونو په څېر یې بېلابېل؛ خو یو له بل سره په اړیکه کې موضوعات رانغاړي.
کتاب کې شپږ دېرش د بریا اصول یا مېتودونه وړاندې شوي. هر مېتود څو ځانګړې نورې شمېرې لري چې هره یوه کې دا مېتود سپړل شوی دی.
د مسلکي ژوند، فکري توزان، ټولنیزو چارو او د هغوی سمبالولو، د مینې کولو، مینې وېشلو، د مینې لاسته راړلو، د مطالعې، د بریا پر لور لارښوونې او د بریا کلیدي تګلارې یې راسپړلې دي.
د ژوند، شتمنۍ، مسافرت، رهبري او د هغې سمبالولو، د غورهوالي، ستونزو او له هغوی سره د مبارزې، خپګان او خوښۍ په هکله یې ښې خبرې او لارښوونې کړې دي.
د هر مېتود په برخه کې چې ځينې شمېرې راوړل شوي، همدې شمېرو کې یې یاد مېتود تشرېح او سپړلی دی. کله چې مېتود پای ته رسي، پرله پسې د همغو اصولو اړوند یې یا مالوماتي ځينې خپلې او د نورو پوهانو ویناوې ځای کړي چې د الهامي یا هڅوونکو ویناوو په نوم یادې شوې دي.
د کتاب زړه راښکونکې برخه هم همدا مثبتې الهامي او هڅوونکې ویناوې دي چې یوازې د څو جملو لپاره یې هم ټول کتاب پر لوست ارزي.
د روبېن د کتابونو ګډه ځانګړنه له منفي کړنو او افکارو سره مبارزه او د مثبت فکر ځایناستي کول دي چې د افغانستان، په ځانګړي ډول پښتانه ځوانان او پېغلې دې ډول کتابونو ته خورا اړتیا لري؛ ځکه یو خو د پښتنو اکثریت سیمو کې د جنګ ټغر غوړېدلی او د مثبت پر ځای هره ورځ منفي فکر ورکول کېږي. څه مستقیم او څه نامسقیم دا افکار کولی شي د ذهن نړۍ ړنګه کړي؛ خو د دین د ستنو په نیولو او د دې ډول هڅوونکو کتابونو په لوست سره به ورو ورو د ځوان نسل مفکورې سمې او تر ټولو مهمه اړتیا چې سم ژوند کول دي، پوره شي.
دلته ځينې هڅوونکې او الهامي خبرې یې د کتاب د بېلګو په توګه راوړم:
-تاسو په اوبو کې د لوېدو په اساس نه غرقېږئ، هلته د پاتې کېدو پر بنسټ غرقېږئ! « کویس کولي»
- یو څو کسان به د تاریخ جوړولو لپاره غوره وي؛ خو نور ټول د ژوند د مثبت بدلون لپاره واړه کارونه کوي. همدا واړه کارونه د راتلونکي نسل لپاره تاریخ وي. « رابرټ اېف»
-له قربانۍ پرته وده کول او لاسته راوړنې ناممکن دي، بریا مو ځان غوښتنې ته په ماتې ورکولو، د پلانونو په غني کولو او عملي کولو کې نغښتې ده. « جېمز آلن»
-روغتیا د روغ پر سر هغه تاج دی چې یوازې ناروغ یې لیدلی شي. « روبېن شرما»
-تمرکز غورهوالی رامنځته کوي او خوارتوب ټنبلي. « روبېن شرما»