د پنجشنبې په ورځ د افغانستان د خپلواکۍ ۱۰۲یمه کلیزه وه، چې د نورو کلونو خلاف سږ کال ډېره کمه ونمانځل شوه، خو افغان لوبغاړي راشدخان د سل بالیزه کرکټ لیګ په پرونۍ لوبه کې د افغانستان تور، سور او زرغون بیرغ پر مخ رسم کړی و او لوبه یې وکړه.
راشد پر خپلې رسمې فیسبوک پاڼې ټولو هیوادوالو ته هم د افغانستان د آزادۍ د ۱۰۲یمې کلیزي په پار مبارکې ویلې وه، چې دا او پرونۍ کړنه یې ټولو هیوادوالو ستایلې او ورڅخه یې ځانګړې مننه کړې، چې د هیواد په دې حساسو شرایطو کې د افغانانو ترڅنګ ولاړ دی.
د امریکا غږ اشنا راډیو خبریال او د کرکټ شنونکي جعفر اند لیکلې:
مننه خانه. راشد خان انګلند کې په لوبو بوخت دی. د افغانستان د استقلال په ورځ یې د لوبډلې لوبه نه وه، خو نن وه او ده خپل اننګي په ملي بیرغ رنګین کړل او نړۍ ته یې دا پيغام ورکړ چې دا وطن او ولس نه مري. #افغانستان_زنده_باد pic.twitter.com/MK03yb3Cvh
— Jafar Haand (@jafarhaand) August 20, 2021
د راپورونو له مخې د انګلستان په سل بالیزه کرکټ لیګ کې دا د راشدخان وروستۍ لوبه وه، چې ډېر ژر به هیواد ته راستون شي او د افغان ملې لوبډلې سره به یوځای شي، ترڅو د پاکستان پر وړاندې دریو یوورځنیو لوبو کې ولوبیږي.
هغه د انګلستان هیواد په دې لیګ کې د خپلې لوبډلې ټرینټ روکیټس لپاره ټولې ۹ لوبې وکړې، چې پکې ۱۲ ویکټې یې ټول ټال واخیستې او تر دې دمه د سل بالیزه لیګ دویم زیاتې ویکټ اخیستونکی لوبغاړی دی.
په دې لیګ کې د راشدخان ترڅنګ محمدنبي، مجیب الرحمن او قیس احمد هم اخیستل شوي او د خپلو لوبډلو لپاره لوبېدلې، خو محمدنبي د راشدخان په څېر خپله وروستۍ لوبه پکې وکړه او هیواد ته یې د راتګ سفر پیل کړ.
د مجیب ځدران او قیس احمد په اړه لا تراوسه خبر نشته، خو دوی هم د پاکستان پر وړاندې لوبډله کې اخیستل شوي، چې باید ژر تر ژره هیواد ته راستانه شي او له ملي لوبډلې سره یوځای شي.