راپور: بشر درویش
په ننګرهار کې اوبدل شوي غالۍ د اروپا او امریکا په بازارونو کې موندل کیږي.
د یاد ولایت د کلیو بیارغونې او پراختیا ریاست د میرمنو د کلیوالي اقتصاد د پیاوړتیا پروګرام WEE-RDP له لوري نږدې ۲۵۰۰ تنه د غالۍ اوبدلو په صنعت بوخت دي چې د دوی په لاس اوبدل شوي غالۍ او نور صنایع اروپا او امریکا کې په بازارونو کې موندل کیږي.
د ننګرهار د رسنیو دفتر یوه خبرپاڼه کې ویلي؛ د یادې ادارې له لورې د بهسودو ولسوالۍ د تعمیراتو په سیمه کې هم ۱۳۸ تنو ته د غالیو اوبدلو په برخه کې د کارموندلو زمینه برابره شوې چې ۱۰۰ تنه یې میرمنې او ۳۸ یی نارینه دي چې د دې صنعت سره په یاده سیمه کی د بی کارۍ کچه راټیټه شوې ده او خلک کولای شی چې د دې لارې د خپلو کورنیو اړتیا وې پوره کړي.
اړتیا او غوښتنه
غالۍ اوبدونکي وايي که یې لاسنیوی وشي، کولی شي چې خپل کار لا ډیر او پراخ کړي.
وایيي، دوی په هره میاشت کی نږدې ۱۵۰ متره غالۍ اوبدي او بازار ته یی وړاندې کوي خو که د خامو موادو او ځینو نورو برخو کې ورته سهولتونه برابرشي غالۍ به یی په نړیوالو بازارونو کی لومړی مقام ترلاسه کړي.
په ننګرهار کې د نور هیواد په څیر بشري قوه ډیره ده، خو اړتیا یې دا ده چې دوی ته اړوند وسایلو او موادو کې د همکارۍ لاس ورکړل شي، څو لا پراخ او په ډیره کچه غالۍ تولید کړای شي.