د انګلستان د فوټبال غوره لیګ ۲۸م پړاو د تیري جمعې په ورځ پیل سو، چي په جمعه، شنبه او یکشنبه ئې د لومړۍ اونۍ لوبي ترسره سوې.
تیره شپه د یادو سیالیو له ډلي منچسټر یونایټیډ او چلسي فوټبال لوبډلي سره ولوبېدې، چي منچسټر یونایټیډ ۴ ګولونه پر ۰ چلسي ته سخته ماته ورکړه.
په یاده لوبه کي د منچسټر لپاره دوې ګولوهني مارکوس راشفورډ، ډانیل جېمز او مارسیال بیا یو ـ یو ګول وواهه.
د دې لیګ د لومړۍ اونیو په نورو لوبو کي لیورپول ۴ ګولونه پر ۱ نارویچ سیټي ته، منچسټر سیټي ۵ ګولونه پر ۰ ویسټ هام یونایټیډ ته، برنلي ۳ ګولونه پر ۰ سوتامپټون ته، برایټون ۳ ګولونه پر ۰ واټفورډ ته، تاتنهام ۳ ګولونه پر ۱ اسټون ویلا ته او آرسنال بیا ۱ ګول پر ۰ نیوکاسټل یونایټیډ ته ماته ورکړه.
په دې لیګ کي ټولي شل لوبډلي دي، چي په یاد لیګ کي به د ۲۰۲۰م کال د مې میاشتي تر ۱۷مي نېټې پوري د تګ او راتګ په ډول ولوبیږي.
که هرې لوبډلي زیاتي نمرې خپلي کړې، هغه ټیم د یاد لیګ اتلولي خپلوي.
انګلستان د فوټبال لیګ (پرېمرلیګ) ۲۷ کاله مخکي په ۱۹۹۲م کال کي پرانیستل سو، چي تر اوسه ۲۷ ځله ترسره سوی او بېلابېلو لوبډلو پکښي اتلولي خپله کړې.
ددې لیګ د تېر پړاو اتلولي منچسټر سیټي خپله کړه.
دا ددې لوبډلي څلورم ځل وو، چي د پرېمرلیګ په سیالیو کي ئې لومړی مقام خپل کړ.
د انګلستان ددې سیالیو ډېره اتلولي منچسټر یونایټیډ خپله کړې، چي دا ټیم توانېدلی ۱۳ ځلي لومړی مقام خپل کړي.
ورپسې چلسي ۵ ځلي، منچسټر سیټي ۴ ځلي، آرسنال ۳ ځلي او بلک بورن رایورز او لیسټر سیټي بیا یو ـ یو ځلي لومړی مقام په دې لیګ کي خپل کړی.