په افغانستان کې له هرو درېیو وګړو یو یې د خوړو له کمښت سره مخ دی.
د افغانستان پر بیا رغونه د امریکا ځانګړې مفتش یا سیګار په خپل تازه راپور کې ویلي چې په دغه هېواد کې شاوخوا ۱۴ میلیونه وګړي له لوږې او قحطۍ سره مخ دي.
د سیګار په راپور کې راځي چې په افغانستان کې له هرو درېیو وګړو یو یې له قحطۍ سره مخ دی.
سرچینه همدا راز وايي چې امریکا په تېرو شلو کلونو کې له افغانستان سره ۱۴۶ میلیارده ډالر مرسته وکړه خو لا هم دغه هېواد له پراخو اقتصادي ستونزو سره مخ دی.
د سیګار په راپور کې راځي چې یوازې د افغان ځواکونو په روزنه شاوخوا ۸۹ میلیارده ډالر لګول شوي دي چې دمګړی هر څه په صفر کې ضرب شول.
یاده سرچینه د بشري حقونو او ښځینه وو د پرمختګ په برخه کې هم لګښتونه بېځایه بولي او په وینا یې شته لاس ته راوړنې په سیند لاهو شوې دي.
په ورته وخت کې د کاناډا لومړي وزیر جسټین ټروډو په تازه څرګندونو کې ویلي، د افغانستان خلک سخت ژمی تېروي او باید لاسنیوی یې وشي.
د ټروډو په خبره له خپلو اروپايي متحدینو سره په اړیکه کې دي او ټول د روان وضعیت په اړه اندېښنه لري نو له همدې امله د بشري مرستو پر پراختیا ټینګار کوي.
ټروډو په دې مرکه کې همدا راز ویلي چې دوی به له افغانانو سره مرستو ته ادامه ورکوي او ددغه هېواد د پرمختګ غوښتونکي دي.
کاناډا دغه راز زیاته کړې چې هلته د تللو کډوالو د ځای پر ځای کولو په لټه کې دي او تر څنګ یې هڅه کوي لا ډېر له خطر سره مخ افغانان وباسي او له نوي حکومت هم غواړي چې خلکو ته د تګ راتګ اجازه ورکړي.
