د سولې او سیاسي چارو په برخه کې د ملګرو ملتونو د سرمنشي مرستیاله روزمیري دي کارلو وايي، دا سازمان له افغانستان سره خپلو مرستو ته دوام ورکوي او افغانان یوازې نه پرېږدي.
نوموړې چې پرون کابل ته خپل درې ورځينی سفر پای ته ورساوه، ویلي چې ملګري ملتونه به له افغانانو سره د ټول شموله، عادلانه او سوله ییزې ټولنې د رامنځته کېدو په برخه کې خپل ملاتړ ته دوام ورکړي.
دي کارلو افغانستان ته د خپل سفر په ترڅ کې له طالب چارواکو، سیاست والو، ښځینه رهبرانو او د مدني ټولنې له استازو سره لیدلي دي.
د ملګرو ملتونو له لوري د خپرې شوې ویناپاڼې له مخې، د دغه سازمان مرستیالې په افغانستان کې د ملګرو ملتونو پر شتون او د خدماتو پر وړاندې کولو ټينګار کړی او ویلي دي، چې دغه سازمان به په اوسني ناوړه وضعیت کې د افغانانو په څنګ کې وي.
د دي کارلو په باور، د افغانستان اوسنی انساني وضعیت د تېر کال په پرتله ناوړه شوی دی.
نوموړې ویلي، ملګري ملتونو د خپلو مرستو د زیاتوالي سربېره له نړیوالو مالي موسسو او نړیوالې ټولنې سره ګډ کار کوي، تر څو د نغدو پیسو د کمښت له امله رامنځته شوی وضعیت تنظیم او په دغه هېواد کې د بشپړې اقتصادي ـ ټولنیزې پاشل کېدا مخنیوی وشي.
په ورته وخت کې د بحران نړيوالې ډلې خبرداری ورکړی، که پر افغانستان لګېدلي بنديزونه لرې نشي، نو ښايي سږ کال ژمي کې تر يو ميليون پورې خلک له لوږې او يخنۍ ومري.
د بحران نړيوالې ډلې له ملګرو ملتونو او ټولو ښکېلو هېوادونو غوښتنه کړې، چې د افغانستان روان اقتصادي او بشري وضعيت ته جدي پاملرنه وکړي او د افغان ولس د ژوند ژغورلو لپاره بايد پر افغانستان لګېدلي بنديزونه لرې کړي.
دغې ډلې اندېښنه ښودلې، که د افغانستان وضعيت همداسې روان وي او بنديزونه لرې نشي، نو ښايي په لنډ وخت کې دومره خلک مړه شي، چې په تېرو شلو کلونو کې د جګړو او بمباريو له امله وژل شوي دي.
د بحران نړيوالې ډلې پر ملګرو ملتونو، امريکا، اروپايي ټولنې، او نورو هېوادونو غږ کړی، چې له اړمنو افغانانو سره بېړنۍ بشري مرستې وکړي او که وضعيت همداسې دوام وکړي، نو ښايي د يخنۍ او لوږې له امله تر يو ميليون پورې خلک خپل ژوند له لاسه ورکړي.
