نړیوال بانک وایي چې د روانې میاشتې تر لسمې نیټې به مرستندویه هېوادونه د بشري مرستو لپاره د افغانستان د بیا رغونې صندوق ته د دغه هېواد د کنګل شوې مالي پانګې د انتقال په اړه خپله وروستۍ پرېکړه اعلان کړي.
رویټرز اژانس د نړیوال بانک د ویاند له قوله راپور ورکړی دی چې په راتلونکې اوونۍ کې به دغه سازمان بشردوستانه بنسټونو ته د افغانستان د مالي پانګې د لېږد په اړه پرېکړه وکړي.
هغه څرګنده کړې ده چې له دې چارې یې هدف په افغانستان کې د فقر مخنیوی او اړمنو سره مرسته ده.
د یادونې ده چې د نړیوال بانک مدیره پلاوي څو ورځې وړاندې د دغه بانک د هغې پرېکړې ملاتړ وکړ چې ویلي یې وو د افغانستان د یو میلیارد او ۵۰۰ میلیون ډالري کنګل شوې مالي پانګې څخه باید ۲۸۰ میلیونه ډالر له افغانانو سره د مرستې په موخه نړیوالو مرستندویه سازمانونو ته ورکړل شي.
هېره دې نه وي چې نن په افغانستان کې د ملګرو ملتونو پخواني استازي کای ایډه په تازه مرکه کې پر نړیواله ټولنه غږ کړی چې د افغانستان له نوي حکومت سره تعامل ته ادامه ورکړي.
د ده په خبره که نړیوال دا چاره ترسره نه کړي، نو د طا لبانو پر ځای به یې افغانانو ته جزا ورکړي وي.
هغه زیاتوي د نړیوالو فشارونو او اقتصادي بندیزونو زیان تر ډېره عامو افغانانو ته رسېږي، نو ځکه نړیوالې ټولنې ته په کار ده چې له نوي حکومت سره د تعامل پروسه چټکه کړي.
د نوموړي په خبره څومره چې تعاملات ډېرېږي، دومره د دواړو لورو ترمنځ تفهیم او مذاکراتو ته لار برابرېږي او دواړه لوري کولی شي د یو بل خبرې واوري.
کای آیډه وايي افغانستان پراخو بشري او اقتصادي مرستو ته اړتیا لري او دا کار له نوي حکومت سره له تعامل پرته ممکن نه دی.
