یادې سیالۍ مې په ۱۱ مه د تېرې سه شنبې په ورځ د ننګرهار په چپرهار ولسوالۍ کې د ۲۴ لوبډلو په ګډون پیل شوې وې او د دوشنبې په ورځ د مې په ۱۷ مه پای ته ورسېدې.
په سیالیو کې د چپرهار ولسوالۍ ګڼو لوبډلو او د نورو سیمو د والیبال ټیمونو ګډون کړی و.
له سیالیو څخه موخه د خوښۍ شېبې رامنځته کول، د خلکو پر شونډو مُسکا خپرول او ملي یووالي ته کار کول وو.
لوبو نږدې شپږ ورځې دوام وکړ، چې له ۲۴ لوبډلو پکې درې لوبډلې خورا ښې وځلېدې.
د ملي یووالي د دې سیالیو لومړی مقام د دولتزیو والیبال لوبډلې وګاټه.
دې لوبډلې پایلوبه کې د پهلوان احمدزي لوبډلې ته ماته ورکړه، چې د پهلوان احمدزي لوبډلې دویم ځای خپل کړ او درېیم ځای هم د شولانې ټیم ترلاسه کړ.
د لوبو د تنظیموونکو په خبره دا ځل سیالۍ ځکه خوندورې وې، چې د ننداره کوونکو له جذبې برخمنې وې.
د چپرهار ولسوالۍ د ورزش امریت په خبره د نورو لوبو په پرتله په دې لوبو کې د ننداره کوونکو شمېر څو برابره زیات و او لوبو ته یې ښکلا وربښلې وه.
دا لومړی ځل نه دی چې چپرهار ولسوالۍ کې د والیبال سیالۍ دایرېږي، بلکې له دې وړاندې هم څو ځلې په دې ولسوالۍ کې د والیبال او کرکټ سیالۍ چمتو شوي دي او د امن په فضا کې پای ته رسېدلې دي.
د چپرهار ولسوالۍ چې پخوا زیاته ناامنه وه، اوس پکې له تېرو درېیوو کلونو راهیسې د سیمه یزو پولیسو پر فعالېدو سره د امنیت کړۍ پراخه شوې او خلک یې په ډاډه زړه کاروبار مخته وړي.
د لوبو د پای په مراسمو کې د چپرهار ولسوال حاجي صدیق دولتزي وویل، چې د سیمې ټول اوسېدونکي باید د د ملي یووالي، ورورګلوۍ او د ولسونو د خوښۍ لپاره نه ستړې کېدونکې هلې ځلې وکړي.
د هغه په وېنا دا ډول سیالۍ د یووالي، د اړیکو د پراختیا، د خوښیو او همدارنګه د ولسونو د همغږۍ لپاره ګټورې وبللې.
