په قطر کې د طالبانو د سیاسي دفتر ویاند ډاکټر نعیم وایي دغه ډله له امریکا سره د سولې د تړون ژمنو ته وفاداره ده او له هغې نه یې سرغړونه نه ده کړې، په داسې حال کې چې افغان او امریکایي چارواکي ادعا کوي چې طالبان د القاعده شبکې په ګډون د تروریستي ډلو سره د اړیکو د شلولو، د تاوتریخوالي د کمولو او د بین الافغاني مذاکراتو په هکله په ژمنو ولاړ نه دي.
نوموړي په یوه مرکه کې ویلي، چې د امریکا او طالبانو په توافقنامه کې راغلي چې د افغانستان له خاورې څخه به د هېڅ یو هېواد پر ضد استفاده نه کیږي او د هغه په وینا طالبان همدې اصل ته پابند دي او تر اوسه یې داسې څه نه دي کړي.
ډاکټر نعیم دغه راز په افغانستان کې په هدفي وژنو کې د دې ډلې لاس درلودل رد کړې دي.
نعیم وایي چې په تېر یو کال کې د طالبانو تاوتریخوالی راکم شوی دی.
هغه ادعا کوي چې طالبانو د دوحې د تړون له لاس لیک وروسته د افغانستان د ولسوالیو او ولایتونو د سقوط لپاره خپل بریدونه درولي دي.
طالبان د افغان سولې مرکچي پلاوي سره چې د امریکا د پرلپسې خبرداريو ورکولو چې ممکن له ټاکلي مهالوېش یعني د مې تر لومړۍ له افغانستانه خپل پوځیان ونه باسي خبرو ته کیناستل.
ځینو امریکايي او ناټو چارواکو خو په زغرده وویل چې تر څو په افغانستان کې د سولې لرلید نه وي څرګند شوی دوی خپل پوځیان له دې هیواده نه باسي.
کتونکي وايي طالبان قصداً غواړي چې د سولې خبرې وځنډوي چې امریکايي پوځیان ووځي او بیا بې له دې چې اوربند وکړي جګړه لا تېزه کړي او د جګړې له لارې ځان هدف ته ورسوي.
خو یو شمېر امریکايي چارواکو وویل چې طالبان به پرېنږدي چې دا ارمان یې پوره شي.
په همدې حال کې د افغانستان د سولې لپاره د دولت وزارت ویاندې ناجیې انوري پرون وویل چې له دریو ورځو راهیسې د دواړو خواوو ترمنځ غونډې پیل شوې دي او د اجنډا په اړه مفصل بحثونه او د نظرونو تبادله شوې ده.
دې په دې بحثونو کې د پرمختګ په اړه څه ونه ویل.
