د پاکستان د کرکټ ملي او د نړیوال کرکټ مشوره لوبغاړی پښتون شاهد خان افریدي خبر ورکړی دی، چې غواړي یو ځل بیا په نړیوال کرکټ کې ولوبیږي.
شاهد خان افریدي، چې د کرکټ په نړۍ کې بې شمیره مینه وال لري او په وروستیو کې یې د نړیوال کرکټ سره مخه ښه کړې ده، خو وخت نا وخت د کرکټ نړۍ په بېلابېلو تجارتي سیالیو کې لوبیږي.
د روان ۲۰۱۸ م کال د مۍ میاشتې په ۳۱ مه نېټه د انګلستان په لارډز کرکټ لوبغالي کې د ویسټ انډیز او د ورلډ ایلیون کرکټ لوبډلې ترمنځ یوه خیریه سیالۍ پلان شوې ده، چې موخه یې ترې د ویسټ انډيز «کاربین» په جزیرو کې د طوفان له کبله د کرکټ لوبغالو او روزنځایونو د بیرته جوړلو لپاره مرسته راټولول دي.
د کرکټ دا خیریه سیالۍ چې د انګلستان په تاریخي لارډز کرکټ لوبغالي کې ترسره کیږي، د کرکټ نړیوالی شورا سره به نړیواله درجه ولري.
په داسې حال کې چې د ورلډ ایلیون یا د کرکټ نړۍ غوره لوبډله دې سیالیو ته اعلان شوې هم ده، خو پاکستاني کرکټر شاهد خان افریدي ویلي دي، که چېرې په دغه سیالۍ کې د لوبیدو وړاندیز ترلاسه کړي، نو چمتو دی، چې په دغه سیالۍ کې، چې نړیواله درجه هم لري؛ پکې ولوبیږي.
شاهد خان افریدي د کرکټ نړۍ هغه لوبغاړی دی، چې د خپلې چټکې توپ وهنې او ښې لیګ بریک توپ اچونې له کبله یې د میلونونو کرکټ مینه والو زړونه خپل کړي دي او لا هم یې هره سیالي ننداره کوي. تر څنګ یې افریدی په نړیواله کچه په بوم بوم مشهور دی.