ليکنه: صابر حميدي
د افغانستان د فوټبال ۱۹ کلني ملي لوبډلي په مرکزي آسیايي سیالیو کي خپله لومړۍ لوبه د جمعې په ورځ مازدیګر د ترکمنستان فوټبال ۱۹ کلني ملي لوبډلي په وړاندي ترسره کړه، چي لوبه ۲ ګولونه په مقابل کي د ۲ ګولونو په مساوي ډول پاي ته ورسېده.
د افغانستان د فوټبال فدراسیون پر رسمي فیسبوک پاڼه لیکل سوي، چي د افغانستان لپاره په یاده لوبه کي فرشید وجودي او طارق محمدي ګولوهني وکړې.
د ورکړل سوو معلوماتو له مخي، چي د افغانستان لوبه ۲ ګولونه پر ۱ د لوبي تر ۸۹یمي دقیقې پوري په ګټه وه، خو د لوبڅار له لوري یوه افغان لوبغاړي ته سور کارټ ورښکاره کړل سو او مقابلي لوبډلي حملې په ثمر ورسېدې او لوبه ئې ۲ ګولونه په مقابل کي د ۲ ګولونو په مساوي ډول پاي ته ورسوله.
په دې سیالیو کي د افغانستان په ګډون ایران، تاجکستان، ازبکستان او ترکمنستان ګډون لوبیږي.
افغان ۱۹ کلن فوټبال ملي ټيم به خپله دوهمه لوبه د شنبې په ورځ ماپښين پر ۴:۳۰ بجې د ازبکستان په وړاندي، درېیمه لوبه به راتلونکې دوشنبه ماښام ۷:۳۰ بجې د کوربه تاجکستان په وړاندي او څلورمه لوبه بیا راتلونکې سې شنبه ماپښین پر ۴:۳۰ بجې د ایران په وړاندي ترسره کوي.
د مرکزي آسیايي هیوادونو ترمنځ د فوټبال دا لوبي د جمعې په ورځ پيل سوې او تر راتلونکي پنجشنبې پوري دوام کوي.