له ملي امنیت ریاست څخه په خپره شوې خبرپاڼه کې راغلي، چې ملي امنیت ځواکونو په کابل کې د حقاني شبکې د لویو بریدونو طرحه کوونکی نیولی.
د ملي امنیت ریاست زیاته کړې، نیول شوی کس عبیدالله نومیږي او په بلال، فاروق او ابراهیم هم مشهور و، چې د ولسمشر د لومړي مرستیال پر دفتر یې د برید کولو طرحه هم جوړه کړې وه.
د یاد ریاست په خبره نیول شوی کس په ۱۳۹۶ کال کې د پېښور حقانیه مدرسه کې زدکړې ترسره کړي او له هغې وروسته د کویټې شورا ته تللی و، چې هلته یې افغانستان کې د ځانمرګي برید لپاره چمتووالی ښودلی و.
د یاد ریاست د معلوماتو له مخې نوموړي ته دنده سپارل شوې وه، ترڅو په جبار قهرمان برید ترسره کړي؛ خو د قهرمان له مړینې وروسته یې ماموریت لغوه شو، چې بېرته ورته پېښور کې د مولوي نیک محمد له لوري، د ولسمشر پر لومړي مرستیال امرالله صالح د برید مسؤلیت ورکړل شو.
سرچینې زیاته کړې چې یاد کس په وروستیو کې پلان درلود چې په مدني فعالي سیلۍ غفاري ځان وژونکې حمله وکړې چې د ملي امنیت د ځانګړو ځواکونو د عملیاتو په پایله کې ونیول شو.
ملي امنیت ریاست په خپره کړې اعلامیه کې ویلي، چې یاد کس د زرغون بهیر د یو غړي پرمټ ځان یاد بهیر ته دننه کړی و او غوښتل یې، چې نور ځانمرګي هم یاد بهیر کې ځای پرځای کړي.
د یادونې ده چې د امرالله صالح په دفتر وسله واله حمله د ۱۳۹۸ لمریز کال د زمري د میاشتې په شپږمه شوې وه چې له امله يې نږدې شل کسه وژل شوي او له پنځوسو ډېر ټپیان شوي وو.
که څه هم هغه مهال د یادې حملې مسولیت کومې وسله والې ډلې نه وو منلی خو صالح يې طالبان مسول بللي وو.
وسله والو طالبانو تر اوسه په دې اړه څه نه دي ویلي.
