وروسته تر هغه چې ملګرو ملتونو او یو شمېر نورو بنسټونو په افغانستان کې د لوږې پر زیاتېدو اندېښنه څرګنده کړه رویټرز اژانس راپور ورکړی دی چې ملګري ملتونه په پام کې لري چې پر اړمنو افغانانو ۳۰۰ میلیونه ډالر نغدي مرسته ووېشي.
راپور کې راغلي چې له دغې مرستې به ډېری اړمن افغانان په مستقیمه توګه برخمن شي او دغه راز به افغانستان له یو ستر اقتصادي ناورین څخه وژغوري.
راپور کې راغلي دي چې دغه ۳۰۰ میلیونه ډالر نغدي مرسته به د کار په بدل کې پر جګړه ځپلو او هغو افغانانو ووېشل شي چې له اقتصادي ستونزو سره لاس او ګریوان دي.
د ویلو ده چې په دې وروستیو کې په افغانستان کې د کار د نشتوالي او اقتصادي ستونزو ډېرېدو له امله ګڼ شمېر افغانانو له خطرناکو قاچاقي لارو بهرنیو هېوادونو ته مخه نیولې ده او نړیوالې ټولنې هم له افغانستان څخه د کډوالۍ د یو بل ناورین خبرداری ورکړی دی.
په ورته وخت کې امریکا وایي طا لبان دې د ټولو افغانانو حقوق خوندي کړي.
د امریکا د بهرنیو چارو وزارت ویاند نېډ پرایس په خبري کنفرانس کې په افغانستان کې د بشري حقونو د وضعیت په اړه وروستي خپاره شوي راپورونه اندېښمنوونکي بولي او وایي طا لبانو ته په کار ده چې د ټولو افغانانو حقونو ته درناوی وکړي او د خوندي کولو لپاره یې هڅه وکړي.
پرایس همدا راز وایي چې د دوی محدودیتونه او بندیزونه هېڅ وخت ددې لامل نه کېږي چې افغانان له بشري حقونو محروم شي او یا دغه هېواد ته بشردوستانه مرستې ونه رسېږي.
هغه ټینګار کړی چې نړیوال کولی شي له افغانستان سره بشردوستانه مرستو ته ادامه ورکړي او په دغه هېواد کې رامنځ ته شوی بشري ناورین کنټرول کړي.
د امریکا د بهرنیو چارو وزارت داسې مهال دغه څرګندونې کوي چې د طا لبانو او امریکا ترمنځ د مذاکراتو نوی پړاو پیل شوی دی او افغان لوری وایي چې خبرې او مذاکرات تر دې دمه ګټوردي.
