د اسپانیا هیواد لالیګا لیګ د ۱۹مي اونۍ لوبو څخه پرون شنبه ریال ماډریډ د ختافې سره او بارسلونا بیا د اسپانیول فوټبال لوبډلي سره ولوبېده.
د ریال ماډریډ او ختافې لوبډلو ترمنځ لوبه د ختافې په کوربتوب پرون ماښام ۷:۳۰ بجې ترسره سوه، چي ریال ماډریډ ۳ ګولونه پر ۰ ختافې ته په خپل کوربتوب سخته ماته ورکړه.
په یاده لوبه کي لومړی ګول خپله د ختافې یوه لوبغاړي ډيویډ سوریا د لوبي په ۳۴مه دقیقه کي خپل د ګول پر دروازې وواهه، خو نور دوه ګولونه بیا د ریال ماډریډ لپاره د لوبي په ۵۳مه دقیقه کي راپایل واران او په ۹۵یمه دقیقه کي بیا لوکاموډریچ وواهه.
د بارسلونا او اسپانیول فوټبال لوبډلو ترمنځ بیا لوبه پرون ماخستن ۱۲:۳۰ بجې د اسپانیول په کوربتوب ترسره سوه، چي دا لوبه بیا دوه ګولونه په مقابل کي د دوو ګولونو په مساوي ډول پای ته ورسېده.
په یاده لوبه کي د اسپانیول لپاره ډیویډ لوپز د لوبي په ۲۳مه او وي لويي بیا د لوبي به ۸۸یمه دقیقه کي ګولوهني وکړې.
د بارسلونا لپاره بیا لیویز سواریز د لوبي په ۵۰مه او آرتو ویډال بیا په ۵۹مه دقیقه کي ګولونه ولګول.
په دې سره د بارسلونا او ریال ماډریډ لوبډلو نمرې ۴۰ ـ ۴۰ مساوي سوې، خو بیا هم بارسلونا تر ریال ماډریډ د ډیرو ګولوهنو په مټ د جدول په لومړي او ریال ماډریډ بیا په دوهم ځای کي شتون لري.