تېره شپه د اسپانیا هیواد د سوپر کپ پایلوبه د دوو اسپانویو لوبډلو ریال ماډریډ او اتلاتیک ماډریډ فوټبال لوبډلو ترمنځ ترسره سوه، چي پکښي ریال ماډریډ په پینالټيو کي اتلاتیک ماډریډ ته په ماتي ورکولو سره یاد جام وګاټه.
د دې دوو زورورو لوبډلو ترمنځ لوبه خورا په جم او جوش د زرګونه مینوالو په شتون کي د سعودي عربستان په کوربتوب راپيل سوه.
دې دوو ټیمونو لوبه ۹۰ دقیقي صفر په مقابل کي د صفر په مساوي ډول پای ته ورسوله، چي وروسته ۳۰ دقیقې نور اضافي وخت ورکړل سو.
په هغه وخت کي هم هیڅ یوه لوبډله ونه توانېده، چي ګولوهنه ترسره کړي، خو دواړو لوبډلو د ګولوهني چانسونه له لاسه ورکړه او لوبه صفر په مقابل کي د صفر په مساوي ډول پای ته ورسېده.
وروسته د ریال ماډریډ او اتلاتیک ماډریډ فوټبال لوبډلو ترمنځ د سوپر کپ یاده پایلوبه تر پینالټيو پوري ورسېده، چي په پینالټيو کي بیا ریال ماډریډ ۴ ګولونه پر ۱ اتلاتیک ماډریډ ته ماته ورکړه او لومړی مقام ئې خپل کړ.
د اسپانیا هیواد په یاد سوپر کپ کي د ریال ماډریډ او اتلاتیک ماډریډ ترڅنګ دوو نورو قوي لوبډلو بارسلونا او والینسیا هم شتون درلود.
ریال ماډرید ـ والینسیا ته او اتلاتیک ماډریډ بیا بارسلونا ته په ماتي ورکولو سره پرونۍ پایلوبي ته لاره پیداکړې وه.