ليکنه: صابرحميدي
د مسئولینو په خبره د افغانستان د ووشو ملي لوبډله د ووشو په نړیوالو سیالیو کي د ګډون په موخه پرون چهارشنبه چین هیواد ته سفر وکړ.
په دې سفر کي ۶ لوبغاړي، دوه روزونکي او یوه پلاوی شامل دئ.
د افغانستان د المپيک ملي کمېټې پر رسمي فیسبوک پاڼه راغلي، چي د ووشو نړیوالي لوبي نن پنجشنبه د چین په شانګهای ښار کي پېلیږي او یوه اونۍ به دوام وکړي.
په دې سیالیو کي د افغانستان په ګډون د ۱۷۰ هیوادونو څخه په سلګونه لوبغاړي ګډون کوي.
د ووشو دا نړیوالي لوبو په دوو برخو مبارزې او فورم کي ترسره کیږي، چي ۵ افغان لوبغاړي به د مبارزې په برخه کي او ۱ لوبغاړی به بیا د فورم په خبره کي د خپلو سیالانو سره میدان ته کښته سي.
د افغان لوبډلي روزونکي سید احسان جمشید زیاته کړه، چي لوبډله پوره چمتوالی لري او په زیاتو هڅو سره به مډالونه هم خپل کړي.
خالد هوتک چي په یادو سیالیو کي به ولوبیږي، وویل، چي د روزونکو له لوري خورا ښه روزنه راکول سوې.
د افغانستان دې لوبډلي ۴ میاشتي تمرینونه ترسره کړي، چي ۳ نیمي میاشتې ئې دلته کابل کي او ۱۵ ورځي ئې بیا په ایران کي د ایراني لوبغاړو سره یو ځای تمریناتي کمپ ترسره کړ.
د ووشو نړیوالي لوبي په دوو کلنو کي یو ځلي ترسره کیږي، چي افغان لوبډلي په دې سیالیو کي تر دې مخکی څو ځله بیلابیل مډالونه خپل کړي.