د افغانستان ا.ا د ملګرو ملتونو هغه پرېکړه غندلې ده چې په دغه سازمان کې یې د افغانستان لپاره ځانګړې شوې څوکۍ دوی ته نه ده ورکړې.
د راپورونو له مخې، تېره ورځ د ملګرو ملتونو یوې ځانګړې کمېټې پریکړه کړې چې د ملګرو ملتونو عمومي اسمبلۍ کې دې د افغانستان څوکۍ د اوس لپاره د افغانستان نوي حکومت ته نه ورکول کېږي.
د طالبانو حکومت ویاند ذبیح الله مجاهد په یوه ټویټر پیغام کې ویلي، د ملګرو ملتونو دا پرېکړه پر اصولو او انصاف نه ده ولاړه، ځکه په وینا یې ”له افغانانو یې مشروع حق اخیستی. ”
د ښاغلي مجاهد په پیغام کې ویل شوي، دوی هیله من دي چې له نړیوالې ټولنې سره د ”مثبت تعامل لپاره به نژدې راتلونکي کې ” د ملګرو ملتونو سازمان کې د افغانستان څوکۍ دوی ته وسپارل شي.
۱/۲ ــ د ملګرو ملتونو یوې ځانګړې کمېټې تېره ورځ پریکړه کړې چې د ملګرو ملتونو عمومي اسمبلۍ کې دې د افغانستان څوکۍ د اوس لپاره د افغانستان نوي حکومت ته نه ورکول کېږي.
دا پریکړه یې په اصولو او انصاف بنا نه ده ځکه چې د افغان ولس څخه یې مشروع حق اخیستی.— Zabihullah (..ذبـــــیح الله م ) (@Zabehulah_M33) December 2, 2021
د دغې پرېکړې په اړه د بهرنیو چارو وزارت ویاند عبدالقهار بلخي ویلي چې د ملګرو ملتونو وروستۍ پرېکړه په اصولو او انصاف بنا نه ده ځکه چې د افغان ولس څخه یې مشروع حق اخیستی دی.
په ورته وخت کې د مخکیني افغان ولسمشر لومړي مرستیال امرالله صالح د ملګرو ملتونو دا پرېکړه ستایلي ده. نوموړي په یو ټویټر پیغام کې ویلي: ”په ملګرو ملتونو کې د افغانستان استازولۍ څوکۍ د افغانستان اسلامي جمهوریت قانوني استازو ته پاتې کېږي، موږ د اعتبار ورکولو ځانګړې کمېټې دا پرېکړه ستایو، هرکلی یې کوو او دا افغانستان ډېرو زخمونو ټکورولو پر لور یو ګام بولو. ”
The Afghan seat in the UN stays with the legitimate & constitutionally mandated representatives of the Islamic Republic of Afgh. We applaud & welcome this decision of the UN's credentials committee & see it as a step for healing the massive wounds inflicted upon the Afghan 1/2
— Amrullah Saleh (@AmrullahSaleh2) December 2, 2021
د یادونې ده چې وسلوالو طالبانو تېره اګست میاشت کې واک ته له رسېدو وروسته د خپل سیاسي دفتر پخوانی ویاند سهیل شاهین ملګرو ملتونو کې د خپل استازي په توګه نومولی و.
خو تېره ورځ ‘چارشنبه ‘ د ملګرو ملتونو یوې ځانګړې کومېټې پرېکړه وکړه چې په عمومي اسمبلۍ کې دې د افغانستان څوکۍ د اوس لپاره افغان طالبانو ته نه ورکول کېږي.
په دې ځانګړې کومېټه کې د امریکا، روسیې، چین، سویډڼ، بهاماس، بوټان، چیلي، نمیبا او سیري لیون هېوادونو استازي شامل وو.
د اې اېف پي خبري اژانس وایي، یادې کومېټې دا نه دي ویلي چې پر دې موضوع به بیا څه وخت غور کوي او که دا یې وروستۍ پرېکړه ده.
