د امریکا په سولې انسټيټوټ کې د افغانستان د مسایلو څارونکی سکاټ سمېټ وایي د مسکو په غونډه کې به د امریکا ټوله هڅه دا وي چې د مسکو غونډه د ترکیې د غونډې د اسانتیا لپاره وکاروي.
د سمېټ په خبره د امریکا موخه دا ده چې ژر تر ژره په افغانستان کې روانه جګړه ختمه شي نو د همدې لپاره یې د ګډ حکومت طرحه وړاندې کړې ده.
هغه وایي چې د مسکو او ترکیې په غونډو کې به تر ټولو ډېر تمرکز پر همدې طرحه وي.
د مسکو غونډه د روانې میاشتې په اتلسمه نېټه جوړېږي چې له افغانستان د ډاکټر عبدالله عبدالله او پخواني ولسمشر حامد کرزي په ګډون یو شپاړس کسیز پلاوی نن په دغه غونډه کې د ګډون لپاره روسیې ته ځي.
په ورته وخت کې د امریکا د بهرنیو چارو وزارت ویلي، د افغانستان په اړه د مسکو د روانې اوونۍ کنفرانس په دوحه کې د طالبانو او د افغانانو د هغه پلاوي ځای نه شي نیولی چې د حکومت چارواکي هم پکې ګډون لري.
په دې غونډه کې د طالبانو د پلاوي مشري د دې ډلې مرستیال او د قطر د دفتر مشر ملاعبدالغني برادر کوي خو له افغانستانه نن (چهارشنبه) د مصالحې د ملي شورا د مشر عبدالله عبدالله په مشرۍ یو پلاوی مسکو ته روانیږي.
په دې پلاوي کې د ولسمشر پخوانی مرستیال مارشال عبدالرشید دوستم، پخوانی ولسمشر حامد کرزی، د اسلامي حزب مشر ګلبدین حکمتیار، د ښځو په استازیتوب حبیبه سرابي، د ولسي جرګې ريیس او د مشرانو جرګې مرستیال هم شامل دي.
د امریکا د باندنیو چارو وزارت مرستیال ویاندې جالینا پورټر یوې خبري غونډې ته د چهارشنبې په ورځ وویل، د مسکو د پنجشنبې د ورځې کنفرانس «په دوحه کې د نورو روانو خبرو متبادل کېدای نه شي.»
ټاکل شوې ده چې د مسکو له کنفرانس وروسته د ترکیې په انقره کې د افغانانو ترمنځ یوه بله مهمه غونډه جوړه شي.
د امریکا د بهرنیو چارو وزیر له ترکیې غوښتي چې په افغانستان کې د یوه لنډمهال حکومت د جوړېدو لپاره د غونډې کوربه توب وکړي خو طالبانو ویلي چې تجربو ښودلې چې لنډمهالي حکومتونه ناکام دي او ولسمشر غني ویلي چې یوازې د انتخاباتو له لارې واک پرېږدي.
