د افغانستان د کرکیټ ۱۹ کلني ملي لوبډلي د سې شنبې په ورځ د انګلستان کرکیټ ۱۹ کلني ملي لوبډلي په وړاندي یوه تمریناتي لوبه ترسره کړه، چي انګلستان ته ئې په ۲۱ منډو توپیر ماته ورکړه.
افغان لوبډلي د لوبي ټاس وګاټه او د توپوهني پریکړه ئې وکړه.
د افغانستان کرکیت لوبډلي د لوبي په ټاکلو ۵۰ آورونو کي د ۸ لوبغاړو په سوځېدو سره انګلستان ۱۹ کلني لوبډلي ته د ۲۰۶ منډو هدف وټاکه.
د افغانستان لپاره په یاده لوبه کي عبدالرحمن ۵۴، اسحق شېرزاد ۴۳، عابد محمدي ۲۶، ابراهیم ځدران ۲۴ او آصف بیا ۱۵ منډي جوړي کړې.
کله چي د انګلستان لوبډله د هدف پوره کولو لپاره میدان ته کښته سوه، افغان لوبډلي ئې ټول لوبغاړي د لوبي په ۴۷،۲ آورونو کي د ۱۸۴ منډو په کولو سره وسوځول.
د افغانستان لپاره فضل حق درې، عبدالرحمن، نوراحمد او شفیق الله غفاري دوه ـ دوه، خو جمشید میر علي خېل بیا د انګلستان یو لوبغاړی وسوځاوه.
په دې سره افغان کرکیټ ۱۹ کلني لوبډلي په خپله دوهمه رسمي تمریناتي لوبه کي انګلستان ته په ۲۱ منډو ماته ورکړه.
تر دې مخکي افغان لوبډلي په خپله لومړۍ تمریناتي لوبه کي د هند څخه سخته ماته خوړلې وه.
د یادو تمریناتي لوبو موخه د ۱۹ کلنو ترمنځ راتلونکي نړیوال جام ته چمتوالی نیول دي.
د ۱۹ کلنو ترمنځ د کرکیت نړیوال جام راتلونکې جمعې ورځ د سویلي افریقا په کوربتوب د ۱۶ هیوادونو ترمنځ پيلیږي او د فیبروري میاشتي تر نهمي نېټې پوري به دوام وکړي.
افغان ۱۹ کلنه لوبډله د نړیوال جام په څلورم ګروپ کي د کوربه سویلي افریقا، متحده عربي آماراتو او کاناډا سره یو ځای ده.
د افغانستان دا لوبډله به راتلونکې جمعې ورځ (جنوري میاشتي په ۱۷مه نېټه) د نړیوال جام لومړۍ لوبه د کوربه سویلي افریقا په وړاندي ترسره کړي، دوهمه لوبه به د جنوري میاشتي په ۲۲مه د متحده عربي آماراتو په وړاندي او درېیمه لوبه بیا د جنوري میاشتي په ۲۴تمه نېټه د کاناډا په وړاندي ترسره کړي.