د آزموینو ملي اداره د هېواد په ۲۵ ولایتونو کې د کانکور آزموینو لړۍ د پیل خبر ورکوي.
یاده اداره وايي، دویم پړاو کې په اتو نورو ولایتونو کې د کانکور آزموینې اخلي او دریم پړاو کې به پلازمېنه کابل کې دغه پروسه ترسره شي.
په ورته وخت کې جګړه ځپلي هلمند کې سلګونه ځوانان د کانکور په درې ورځنۍ ازموینه کې ګډون کوي.
هلمند یو له هغه ولایتونو دی چې تېرې شل کلنې جګړې ځپلی دی، خو بیا هم ددې ولایت نوي ځوانان د زده کړو په لټه کې دي.
د ازموینو ملي اداره وایي چې په دغه ولایت کې۳۳۰۰ زده کوونکو د کانکور په ازموینه کې ګډون کړی دی.
لښکرګاه ته د ازموینو ملي ادارې د تللي پلاوي مشر پوهنمل محمد حامد همدرد وویل چې دغه ازموینه به درې پړاوه ولري او په درې پړاوونو کې به د ۳۳۰۰ په شاوخوا کې زده کوونکي په دې ازموینه کې ګډون وکړي.
د هغه په خبره په دې ډله کې ۳۲۳ یې نجونې او پاتې نور یې هلکان دي.
د ازموینو ملي ادارې ویلي چې په ګڼو ولایتونو کې یې د کانکور ازموینه پيل کړې ده او زرګونه زده کوونکي به پکې ګډون وکړي.
بلخوا ننګرهار کې د ۲ زره ۷۹۲ نجونو په ګډون له ۱۴ زره ۳۳۲ کسانو څخه د کانکور آزموینې بهیر نن سهار پیل شو.
ځايي چارواکي وايي، د آزموینو دغه بهیر به څلور ورځې دوام وکړي.
په لغمان کې هم د ۲۶۶۰تنو د دولسم ټولګي له فارغو شویو زده کوونکو څخه د کانکور ازموینې داخیستلو لړۍ پیل شوه.
د لغمان پوهنتون رئیس عصمت الله دراني د معلوماتو له مخې چې د سږ کال په کانکور ازموینه کې ۲۶۶۰ د دولسم ټولګي فارغ شوي هلکان او انجونې ګډون کوي.
