د هندي سینما د وتلي ستوري سنجي دت له لوړو ژور پر ډک ژوند د جوړ شوي فلم کارګرداني د نوموړي نژدې دوست راج کمار هیراني کړې او رنبیر کپور په کې د سنجي دت رول لوبولی دی.
ټاکل شوې ده، دا فلم په جون میاشت کې په سینماګانو وښودل شي، خو د سنجي دت مینه وال یې له اوسه انتظار کوي.
راج کومار هیراني پر خپل ټویټر د سنجي دت پر ژوند ددې جوړ شوي فلم ځینې تصویرونه خپاره کړي دي.
په یوه دقیقه او پنځه ویشت ثانیې دې بیلګې کې له تنکي زلمیتوب تر 50 کلنې د سنجي دت ژوند ښودل کیږي.
په نمونو کې ښکاري چې رنبیر کپور په فلم کې د خپل تمثیل کمال ښودلی او هغه کټ مټ لکه سنجي دت ښکاري.
له بله پلوه د فلم له خپرو شویو نمونو داسې ښکاري چې د فلم د نوم پر سر د رنبیر کپور او راج کومار هیراني جنجال چې مخکې یې راپور ورکړل شوی و هوار شوی دی.
دې فلم ته ” سنجو “ نوم ورکړل شوی دی.
سنجي دت د هندي سینما یو له محبوبو اکټرانو څخه دی چې شخصي او هنري ژوند یې تل له لوړو ژورو ډک وو. اوس د هندي سینما مینه وال د ” سنجو “ فلم ته ددې لپاره انتظار باسي چې نه یوازې د د سنجي دت د ژوند په کیسې خبر شي بلکې د رنبیر کپور د اداکارۍ کمال هم وګوري چې څنګه یې ځان له رنبیر کپور په سنجي دت بدل کړی دی.