خبر: بشر درویش
کونړ کې د ځنګلي پړانګ نیول شوي بچي د کونړ والي له لوري د چاپیریال ساتنې ملي ادارې ته وسپارل شول.
د کونړ ولایت د مطبوعاتو یوه خبرپاڼه کې ویلي؛ د پړانګ دغه درې بچي چې د کونړ ولایت پېج درې ولسوالۍ د شوړیک درې په ځنګلونو کې نیول شوي و د کونړ والي، امنیتي ارګانونو او ځایي خلکو په هڅو له سیمې تیره ورځ انتقال او نن د چاپیریال ساتنې ملي ادارې ته وسپارل شول.
ځایي خلک وایي ځنګلونو کې اوس هم داړونکې ژوي شته او وخت ناوخت د دوی د مالونو په رمو یرغل کوي.
د رسنیو دفتر خبرپاڼه کې د والي عبدالستار میرزکوال له قوله ویل شوي چې د دې ولایت د جغرافیې ساتلو مسوولیت لري، د امنیت نیولي، تر پرمختیایي چارو، ځنګلونو بیا احیا، قاچاقو مخنیوي او د ځنګلي ژویو د ساتلو په برخه کې به خپل مسوولیت ادا کړي.
کونړ چې ډیری سیمي یې ځنګلونه لري، د ځنګلونو وهلو، جګړو او بمباریو له امله ځنګلي ژویو نورو سیمو ته کډه کړې، خو په لیرې پرتو سیمو کې اوس هم بېلابېل ډولونه شتون لري، خو تر دې دمه یې د ناقانونه ښکار مخه نده نیول شوې.
