ژباړه او زیاتونه: بشر دروېش
په ۲۰۱۸ میلادي کې پاکستان له ګڼو لوړو ژورو سره مخ شو.
دلته به د دغه هېواد له مهمو بدلونونو خبرشئ.
د ټرمپ او اسلام اباد ناندرۍ
پاکستان چې له کلونو راهیسې یې له امریکا څخه د ترهګرۍ ضد مبارزې په نوم په میلیاردونه امریکایي ډالر ترلاسه کول، تېرکال د قهرجن ولسمشر ټرمپ له غوسې سره مخ شو.
ټرمپ پاکستان ته ګواښونه وکړل، مرستې یې پرې کمې او بندې کړې، دروغجن او وعده خلاف هېواد یې وباله.
د ټرمپ توندو خبرو چین او ترکیه، چې د پاکستان ښه ملګري دي، د دغه هېواد دفاع ته اړویستل.
پاکستان د ټرمپ د خبرو غچ د ډېرو په باور له افغانستانه واخیست، دلته یې ترهګري نوره هم پياوړې او سختو بریدونو ته زور ورکړ.
د ټرمپ او پاکستان له جنجاله، چې څه افغانانو ته د زده کولو دا و، چې د هغه د خبرو پر وړاندې د پاکستان ټول ښي اړخي، کیڼ اړخي او نور متضاد ګوندونه یو لاس شول او د پاکستان دفاع یې وکړه.
پرافغان کډوالو فشارونه
پاکستان هم د افغان حکومت د فشار لاندې راوستو او هم د امریکا د مقابلې په نیت پر افغان کډوالو قیودات سخت کړل او دوی یې په ۲۰۸ کې ډېر وځورول.
دا کار یې ډېروخت هغه مهال کاوه، چې افغان حکومت به د افغانستان په نا امنیو کې د پاکستان د ښکاره لاسوهنې یادونه کوله او اعتراض یې پرې کاوه.
په کور دننه ناندرۍ
پاکستان د نړیوالو او سیمه ییزو اړیکو د ترینګلتیا ترڅنګ په کور دننه هم چندان ښه نه و.
د دغه هېواد یو لومړی وزیر نواز شریف د پوځ په فشار د فساد د یوې قضیې له کبله محکمه او بیا بې واکه شو.
نواز شریف زندان ته ننویستل شو، له سیاسته منع شو او خبره دې ته ورسیده، چې اوسنی صدراعظم عمران خان د ډېرو په ګومان د پوځ په کلک ملاتړ د توقع خلاف واک ته ورسید.
د ۸ کلنې زینب قضیه
زینب یوه ۸ کلنه پاکستاني نجلۍ وه، چې ترجنسي تېري وروسته په وحشتناک ډول وژل شوې وه.
د هغې قضیې په پاکستان کې توند غبرګونونه وپارول. خلکو لویې مظاهرې وکړې او د قضیې د عاجلې او سمې څېړنې غوښتنه یې وکړه.
د اسیه بي بي قضیه
واک ته د عمران خان له رسیدو وروسته د پاکستان سترې محکمې د اکټوبر په میاشت کې مقدساتو ته په سپکاوي تورنه او په اعدام محکومه عیسوی میرمن اسیه بي بي بې ګناه وبلله او له زندان څخه یې د هغې د خوشې کیدو امر وکړ. دې پریکړې په ټول پاکستان د تحریک لبیک د سخت دریځې ګوند په مشرۍ توندې او له تاوتریخوالې ډکې مظاهرې راوپارولي. د عمران خان حکومت وروسته له دوی سره جوړجاړي ته غاړه کېښوده. حکومت له مظاهره چیانو سره ومنله چې د دوی په شکایت به غور کیږي او اسیه بي بي به له پاکستان څخه بهر نه پرېښودل کیږي.
د عمران خان کچکول
عمران خان، چې د ځپلي اقتصاد د رغونې له شعارونو سره واک ته رسیدلی، د بهرنیو سفرونو یو لوی هدف یې دا وي، چې له نورو هېوادونو او نړیوالو سازمانونو څخه د پاکستان لپاره پور وغواړي یا مرستې ترلاسه کړي.
هغه د اقتصادي اصلاحاتو په نوم ځینې بدلونونه هم پيل کړي، خو لا یې چندان د پام وړ نتیجه نه ده ورکړې.