د بنګله دیش د کرکټ ملي لوبډلې الراونډر لوبغاړي شکیب الحسن د ویسټ انډیزۍ کرکټ ملي لوبډلې خلاف د سیالیو په غبرګو لړیو کې په خپلې ګټې د افغان الرانډر کار خراب کړ.
د بنګله دیش او ویسټ انډیز د کرکټ ملي لوبډلو ترمنځ په روانه ډیسمبر میاشت کې درې ۲۰ اوریزه او درې ۵۰ اوریزه سیالۍ ترسره شوې، چې پکې بنګله دیشي الراونډر شکیب الحسن د بهترینې کار کردګۍ په ترسره کولو سره د کرکټ نړیوالې شورا په درجه بندۍ کې مخکې تګ وکړ.
نوموړی لمړی د درې ۵۰ اوریزه سیالیو د ترسره کیدو وروسته د ۵۰ اوریزه سیالیو د الراونډرانو په درجه بندۍ کې له دریم مقام څخه دویم ته ورسید او ورپسې یې درې ۲۰ اوریزه سیالیو د ترسره کیدو وروسته په ۲۰ اوریزه درجه بندۍ کې هم دویم مقام خپل کړ.
بنګله دیشي شکیب الحسن په دې کار سره افغان لوبغاړی محمد نبي عیسی خیل په دواړو ۲۰ اوریزه او ۵۰ اوریزه سیالیو د الراونډرانو په درجه بندۍ کې له خپل دویم مقام څخه وروسته کړ.
نوموړي نه یوازې په دغه کار کردګۍ سره محمد نبي عیسی خیل وروسته کړ؛ بلکې د یو ورځینیو سیالیو لمړی الراونډر راشد خان هم وننګو، چې یواځې د یو پواینټ په وروسته والي یې دویم مقام کې پاتې شو.
اوس مهال افغان راشد خان د ۳۵۳ ریټینګ په درلودلو سره لمړی، شاکیب الحسن د ۳۵۲ ریټینګ سره دویم او محمد نبي د ۳۳۷ ریټینګ پواینټونو په درلودلو سره دریم مقام لري.
همدا راز دغه بنګله دیشی لوبغاړی په وروستۍ کارکردګۍ سره د ۲۰ اوریزه سیالیو د بالرانو په درحه بندۍ کې هم له خپل پخواني ۱۰ م مقام څخه ۷ ته رسیدلی دی او ورسره د ټیسټ سیالیو په الراونډرانو کې هم په لمړي مقام راج کوي.