له اسراییلو سره د پاکستاني حکومت د پټو او حتا استخباراتي اړیکو ډېرې ادعاوې شوې وې، خو اوس دا خبره مخ په رسمي کیدو ده.
د پاکستان پخواني ولسمشر او پوځي دیکتاتور جنرال پروېز مشرف دا ځل په یوه تازه مرکه کې ویلي، چې پاکستان د هند پر وړاندې د بریالیتوب لپاره باید اسراییل په رسمیت وپېژني.
د اړیکو اسلامي توجیه
دغه پخوانی پوځي دیکتاتور، چې د پاکستان د نورو ګڼو سیاستوالو په شان تل د اسلام له نومه ابزاري استفاده کوي، له اسراییلو سره وړاندیز کړو اړیکو ته هم اسلامي توجیه لټولې ده.
هغه په تازه څرګندونو کې ویلي، چې له اسراییلو سره د پاکستان اړیکې نه یوازې دغه هېواد؛ بلکې نورو اسلامي هېوادونو ته هم ګټه کوي.
ده د دغې ادعا شوې ګټې نور جزیات نه دي روښانه کړي، خو ویلي چې که پاکستان له اسراییلو سره اړیکې جوړې کړې، نورو اسلامي هېوادونو ته به هم د اړیکو ټینګولو زمینه مساعده او امنیت به یې غښتلی شي.
پخواني پاکستاني ولسمشر ویلي، چې ده د خپلې واکمنۍ پر وخت له اسراییلو سره د اړیکو ټینګولو هڅې وکړې، چې مثبته پایله یې نه لرله.
پروېز مشرف له اوسني پاکستاني حکومت څخه غوښتي، چې دوی دې په دې برخه کې خپلې هڅې په کار واچوي.
د مشرف تازه حال
پروېز مشرف، چې د واکمنۍ پر وخت یې د مالي فساد او د اساسي قانون د نقضولو ترڅنګ د پیپلز پارټۍ د مشرې او پخوانۍ صدراعظمې بینظیر بوټو په وژلو تورن دی، له ۳ کلونو راهیسې په دوبۍ کې ژوند کوي.
مشرف په پاکستان کې دوسیې لري، څو ځله محکمه شوی او محکوم شوی هم دی، خو په ضمانت یي د درملنې په نوم له زندانه ځان خلاص کړی او له هېواده وتی.
دی اوس وایي، چې روغتیا یې ښه ده او د ناروغۍ خبرونه یې ځینې له سیاسته د هغه د لیرې ساتلو په نیت کوی.
هغه، چې له واک وروسته یې په پاکستان کې یو سیاسي ګوند هم جوړ کړی، وایي پاکستان ته د داسې ورتګ لېواله نه دی، چې ورسره سم زندان ته واچول شي.
نوموړی د عمران خان د حکومت ملاتړ کوي او وایي د هغه په واکمنۍ کې ممکن پاکستان ته ور ستون شي.
د مشرف په وینا د عمران خان د کابینې نېمایي غړي د ده پخواني وزیران دي.