د انګلستان خلاف مسلسل ماتو وروسته د سریلنکا کرکټ ملي لوبډلې لپاره نوی لوبډلمشر لاسیت ملینګا وټاکل شو.
د کرک انفو، کرکټ نړیوالې شورا او د سریلنکا کرکټ بورډ خبر ورکړ، چې د نیوزیلینډ خلاف درې ۵۰ اوریزه او یوې ۲۰ اوریزه سیالۍ ته تیز بالر لاسیت ملینګا نوی لوبډلمشر ټاکلی دی.
که څه هم لوبډلې کې د پخواني کپتان انجیلا متیوز راستنیدو ترڅنګ د اوسنیو ټیسټ او پخوانیو یو ورځینیو سیالیو لوبډلمشر دینش چاندیمال هم شتون لري، خو سریلنکا کرکټ بورډ خپله نوې ټاکنه کړې ده.
له دې وړاندې پخوانی کپتان انجیلا میتیوز د فزیکي جوړښت د خرابیدو له کبله د لوبډلې څخه ډراپ شوی و، چې پر ځای یې بیا دینیش چاندیمال لوبډلمشر ټاکل شوی و، خو اوس د نیوزیلینډ خلاف راتلونکو سیالیو ته ملینګا غوره شوی دی.
ښي لاسی تیز بالر لاسیت ملینګا د (فزیکل فیټنس) یا بدني ځواک له کبله د څه باندې یو کلن ځنډ وروسته درې میاشتې وړاندې بیرته د سریلنکا کرکټ ملي لوبډلې ته راګرځیدلی.
د انګلستان خلاف سیالیو کې د لاسیت ملینګا د ښه ځلیدو وروسته پر نوموړي د لوبډلمشرۍ باور هم شوی، خو لا هم نه دي ویل شوي، چې په راتلونکي وخت کې به هم د لوبډلمشرۍ دنده ترسره کړي.
اوس مهال د سریلنکا او نیویلینډ د کرکټ ملي لوبډلو ترمنځ د دوه ټیسټ لوبو لړۍ پیل شوې، چې د روانې ډیسمبر میاشتې په ۳۰ مه نېټه پای ته رسیږي او ورپسې به د ۲۰۱۹ م کال جنورۍ میاشتې په ۳ مه نېټه د درې ۵۰ اوریزه سیالیو سیریز پیل شي، خو یوآځینۍ ۲۰ اوریزه لوبه به د همدغه میاشتې په ۱۱ مه نېټه ترسره شي.