راپور: بشر درویش
د ملي مصالحې عالي شورا او د مشورتې لویې جرګې رییس ډاکټرعبدالله عبدالله رسنیو سره په یوه خبري ناسته کې وویل، د طالب بندیانو د خوشې کېدو په تړاو د دې مشورتي جرګې د پنځوسو کاري کمېټود کار پر وخت په ځینو برخو کې مخالفتونه وه؛ خو اکثریت غړي پدې نظر دي، چې په هېواد کې د دایمي سولې او ثبات د راوستلو لپاره دې یاد طالب زندانیان خوشې کړای شي.
د مصالحې عالي شورا په خپله فبسبوک پاڼه لیکلي؛ د کاري کمېتو د مشورو او وړاندیزونو په تړاو به د سولې د دې لویې مشوري جرګې وروستۍ پرېکړه سبا اعلان شي.
ډاکټر عبدالله زیاته کړه:
«د کمېټو کارونه پایې ته رسېدلي او له نظرونو څخه به یې افغان حکومت، د ملي مصالحې عالي شورا او طالبانو سره د خبرو مرکچي پلاوی په بین الافغاني مذاکراتو کې ګټه واخلي.»
د ملي مصالحې عالي شورا او د مشورتې لویې جرګې رییس وویل، د دې جرګې د پای ته رسېدو سره سم به د ملي مصالحې عالي شورا رهبري پلاوی اعلان کړي او خپله لومړۍ ناسته به وکړي.
یادې شورا ویلي؛ د سولې بین الافغاني خبرې به د جرګې د پاې ته رسېدو درې ورځې وروسته پیل شي، چې لومړۍ ناسته به یې په قطر هېواد کې وي.
د ملي مصالحې عالي شورا او د مشورتې لویې جرګې رییس د هغه ګونګسو په ځواب کې چې ګوندې دا جرګه فرمایشي ده وویل:
«جرګه فرمایشي نده او د ولس استازي د دې وطن مجبورتونه ښه درک کولی شي، داسې پرېکړه به وکړي، چې د هېواد او هېوادوالو په خیر به یې او زیاته یې کړه تر اوسه له دې ۴۰۰ طالب زندانیانو یو یې هم له بنده ندی ازاد شوی.»
ښاغلي عبدالله همدارنګه د رسنیو له مسؤلینو او خبریالانو هم مننه وکړه، چې پر وخت یې د جرګې له جریان او د سولې له خبرو ولسونه خبري کړي، چې د سولې په خبرو کې دا مهم ټکی دی.
د اکثرو کمیټو مشرانو او غړو پر فیسبوک لیکلي چې په پرنسیپ کې زیاتو کمیټو د بندیانو خوشې کیدل تائید کړي دي، خو دا یو شمیر شرطونه يې پسې تړلي چې ویل کیږي، سم لاسي اوربند او د اوربند او خبرو نړیوال ضمانتونه غوښتل شوي دي.