راپور: نسیمه محمدي
د راپورونو پر اساس، د فلسطین رهبریت د اسرائیل او بحرین د اړیکو عادي کولو کړنلاره غندلې او دا کړنه یې د فلسطین د هيلو پر وړاندې خیانت یاد کړی.
له دې وړاندې د امریکا ولسمشر، ډونالډ ټرامپ د جمعې ورځې په لومړیو کې اعلان وکړ، چې بحرین او اسرائیل د ډېپلوماټیکو اړیکو جوړولو لپاره توافق کړی.
تمه ده چې د اسرائیل او بحرین ترمنځ تړون راتلونکې اونۍ په سپینه مانۍ کې لاسکلیک شي.
د ولسمشر ټرامپ زوم او سلاکار، کوشنر اعلان کړه چې د سپټمبر په ۱۵مه بحرین له اسرائیل سره تړون لاسلیکوي.
د ټراپ سلاکار زیاته کړه:
“داسې څه ډېر کم پېښېږي، چې په یوه ورځ کې د سولې دوه تړونونه (اړیکو عادي کول) لاسلیک شي.”
تر دې دمخه ولسمشر ټرامپ په خپله ټوېټر پاڼه کې لیکلي، چې بحرین له اسرائيلو سره دوستانه اړیکي جوړوي.
ټرامپ لیکلي:
“نن یوه بله ستره تاریخي بریا! زموږ دوه دوستو هېوادونو اسرائیل او د بحرین شاهي هېواد، د سولې په اړه هوکړه کړې؛ دا دویم عربي هېواد دی چې د دېرش ورځو په جریان کې له اسرئیل سره سوله کوي.”
کوشنر وویل:
“سه شنبه موږ په سپینه مانۍ کې د هوکړه لیک مراسم لرو، خو اوس ځکه زیات ارزښت پیدا کوي، چې بحرین خپل د بهرنیو چارو وزیر هم د لاسلیکولو لپاره لېږي.”
له دې وړاندې اسرائیل او متحده عربي اماراتو هم پرېکړه وکړه، چې د دواړو هېوادونو اړیکې په بشپړه توګه عادي کړي.
د امریکا سره په درې اړخیزه بیانیې کې وویل شول، چې اسرائیل د اماراتو سره د تړون د شرایطو پر بنسټ، د باختري څنډو سیمې د تل آیو د پراختیا پرېکړه په موقت ډول ځنډوي. همدارنګه اسرائیل او متحده عربي امارات به په راتلونکو اونیو کې د پانګونې، توریزم، مستقیمو الوتنو، امنیت، له لرې واټن اړیکو او نور مواردو کې تړونونه لاسلیک کړي.
په ورته وخت کې د حماس ویاند، حازم قاسم وویل، چې دا ګوند”د بحرین او اسرائیلو د اړیکو عادي کولو تړون د پېړۍ معاملې(د ټرامپ د سولې نوښت) د تلپاتې ګټو لپاره ګڼي، چې د فلسطین شتون به له منځه یوسي.”
همدارنګه د بحرین او اسرائیلو ترمنځ د اړیکو د عادي کولو له اعلان وروسته؛ فلسطین په منامه کې خپل سفیر راوغوښت.
صائب عریقات، د فلسطین د ازادۍ سازمان د اجرايي کمېټې لومړي مشر اعلان کړه، چې فلسطین د محمود عباس په امر، په بېړه د خودمختاره فلسطین د تشکیلاتو رییس را وغوښت.
صائب عریقات وویل، هر هېواد چې له اسرائیلو سره سوله وکړي، فلسطین به خپل سفیر ترې را وغواړي.