لیکنه:محمدصابر حمیدي
د متحده عربي آماراتو کرکټ بورډ وايي، چې هڅه کوو د آی پي ایل په سیالیو کې ۳۰ او یا هم ۵۰ سلنه نندارچیانو ته په لوبغالي کې د شتون زمینه برابره کړو.
د متحده عربي اماراتو د کرکټ بورډ چارواکو ویلي، چې یو ځلې له هند کرکټ بورډ څخه تایید ترلاسه کړو، له هغه وروسته دا هڅې پيلوو، چې په لوبغالي کي نندارچیانو ته له نژدې د لوبو لیدلو زمینه برابره کړو.
د دوی په خبره، چې په متحده عربي اماراتو کې کورونا ویروس دومره ندی خپور شوی، نو هرو مرو به لوبغالي کې نندارچیانو ته اجازه ورکړي.
د تازه ریپوټونو په اساس د هندوستان د کورنیو تجارتي سیالیو ۱۳م پړاو د سیپټمبر میاشتې په ۱۹مه نېټه پيلیږي او د نوومبر میاشتې تر ۸مې نېټې پوري به دوام وکړي.
دا لیګ سږ کال د هند په ځای متحده عربي اماراتو کې ترسره کیږي.
دا ځکه چې په هندوستان کې کورونا ویروس مخ په پراخېدو دی.
په متحده عربي اماراتو کې د هند کورنیو سیالیو ترسره کول نوې خبره نده؛ بلکې تر دې مخکې په ۲۰۱۴م کې هم یو ځلې آی پي ایل په متحده عربي اماراتو کې ترسره شوی او د دې ترڅنګ په ۲۰۰۹م کې بیا هند کې د عمومي ټاکنو له امله سویلي افریقا کې ترسره شوی.
د نړیوال جام او اسیا جام تر ځنډېدلو راوروسته اوس د ټولو کرکټرانو او مینوالو سترګې IPL ته دي.