عمران خان د افغان کرکټ ملې لوبډلې د چټک پرمختګ ستاینه کړې
د پاکستان لومړي وزیر عمران خان په خپلو تازه څرګندونو کې ویلې، افغان کرکټ ملې لوبډله یوازینۍ لوبډله ده، چې په ډېره کمه موده کې یې زیات پرمختګ وکړ او زیاتې لاسته راوړنې لري.
عمران خان د پاک افغان ځوانانو فورم «PAYF» پلاوي سره په اسلام اباد کي د نورو څرګندونو ترڅنګ د سپورټ او په خاصه توګه د افغان کرکټ ملې لوبډلې په اړه ږغېدلی، چې د ملې لوبډلې د چټک پرمختګ او لږ موده کې یې د زیاتو لاستهراوړنو ستاینه کړې.
د پاکستان لومړي وزیر زیاته کړې، هیڅ یوې لوبډلې په ۷۰ کلونو کې هم دومره چټک پرمختګ نهدی کړی، لکه څومره چي افغان لوبډلې وکړ.
هغه وویل:
«په کوم حالت کي چې افغانستان په کرکټ کې اوس مهال ولاړ دی، نورو هیوادونو په ۷۰ کلونو کې هم هغومره پرمختګ نه دی کړی.»
We are grateful to Prime Minister @ImranKhanPTI for his valuable time and a prolific meeting with our Afghan Delegation for #PakAfghanMediaConclave.
As #PartnersForPeace, our joint efforts will pave way for a peaceful Afghanistan and a prosperous region. https://t.co/tULG7r5RPe
— Pak Afghan Youth Forum (@payf_eng) July 29, 2021
عمران خان پر داسي مهال د افغان کرکټ ملې لوبډلې ستاینه کوي، چې د تېر ۲۰۲۰م کال په نوومبر میاشت کې هغه کابل ته د خپل سفر په ترڅ کې له افغان ملې لوبډلې سره وکتل او افغان لوبډلې ته یې پاکستان ته د ورتګ بلنه ورکړه، ترڅو د پاکستان ملې لوبډلې سره څو دوستانه سیالۍ وکړې.
بل پلوه افغان او پاکستان کرکټ ملې لوبډلې راتلونکې سیپټمبر میاشت کې د کرکټ نړیوالې شورا د سوپرلیګ درې سیالۍ ترسره کوي.
دا سیالۍ، چې د سیپټمبر میاشتې په لومړۍ، درېیمه او اوومه نېټه ترسره کیږي، د افغانستان په کوربتوب به په سریلانکا هیواد کې وشي.
افغان کرکټ ملې لوبډلې دې سیالیو ته د ښه چمتوالي په موخه په دوو پړاوونو کې تمرینونه ترسره کړل او له هغه وروسته افغان کرکټ بورډ د پاکستان پر وړاندې ۱۷ کسیزه لوبډله هم اعلان کړه، چې پکې تر ډېره ځوانو لوبغاړو ته ځای ورکړل شوی.
