راپور: بشر درویش
د پکتیا د کرنې، اوبولګولو او مالدارۍ ریاست چارواکي وایي، چې ددې ولایت د مرکز ګردیز اړوند د ابراهیم خېلو او صادق خېلو د سربندونو او کانالونو د جوړولو چارې په چټکۍ سره روانې دي، چې ډېر ژر به یې ودانیزې چارې بشپړ او ګټې اخیستنې ته به وسپارل شي.
د افغانستان د کرنې وزارت چارواکو د یاد ولایت چارواکو له قوله وایي، چې د صادق خېلو د سربند او کانال چارې ۶۶ سلنه او د رحمت خېلو د کانال او سربند د جوړولو چارې ۷۰ سلنه بشپړ شوي دي، چې پاتې چارې به یې هم ډېر ژر بشپړ او ګټې اخیستنې ته به وسپارل شي.
د ځمکې خړوبول
د یادو سربندونو او کانالونو په جوړېدو سره زرګونه جریبه ځمکه د خړوبولو تر پوښښ لاندې راځي او زرګونه کورنۍ ورڅخه هر اړخیزه ګټه پورته کوي. دغه پروژه چې د کرنې، اوبولګولو او مالدارۍ وزارت له پراختیایي بودیجې څخه تمویلیږي، د روغولو چارې یې په بشپړېدو دي.
کرنې وزارت ویلي؛ ددې پروژې په بشپړېدو سره د اوبو د ضایعاتو مخه نیول کیږي او ترڅنګ یې د یادو سربندونو او کانالونو د تر پوښښ لاندې ځمکو کرنیز محصولات به هم د پام وړ زیات شي، چې د بزګرانو په اقتصادي وده کې به رغنده رول ولري.
