راپور: بشر درویش
د افغانستان د ښار جوړولو او ځمکو وزارت سرپرست وزیر د بهسازۍ پنځه پلانونه منظور کړل.
یاد وزارت یوه خبرپاڼه کې ویلي؛ سرپرست وزیر محمود کرزی په ملي شورا کې د خلکو د استازو، ښاروالانو او د ښارجوړولو د رئیسانو په حضور کې د فاریاب، سرپل، پروان او سمنګان ولایتونو لپاره د بهسازۍ پنځه پلانونه منظور کړل.
په دې موخه جوړه شوې غونډه کې محمود کرزي د یادو پلانونو منظوري او تطبیق یې غیر رسمي سیمو ته د ښو ښاري خدمتونو د وړاندې کولو لپاره اړین وباله او له ټولو اړونده ادارو څخه یې وغوښتل چې په پوره همغږۍ او ژمنتیا سره یاد پلانونه تطبیق کړي.
دا پلانونه څه او د څه لپاره دي؟
په دې پنځه پلانونو کې د فاریاب ولایت په اندخوی ولسوالۍ په لومړی ناحیه کې د تواچي کلان سیمې د بهسازۍ پلان، د سرپل ښار د لومړی او دویمې ناحیې د بهسازۍ پلان، د پروان ولایت د چاریکار ښار د نو اباد خواجه ها او د نو اباد خواجه ها او نو اباد خواجه سیاران توپدرې سیمې د بهسازۍ پلانونه او همدارنګه د سمنګان ولایت د ابیک ښار د قوش اسیاب بالا او قوش اسیاب پائین د بهسازۍ پلان شامل دي.
د ښار جوړولو او ځمکو وزارت په خبرپاڼه کې ویلي چې دا وزارت د سکتوري ادارو سره په همغږۍ د بهسازی د پلانونو او احیاء مجدد پروګرامونو په تطبیق سره هڅه کوي ترڅو غیر رسمي او غیر پلاني سیمې په ښو استوګنیزو سیمو بدلې کړي ترڅو له دې لارې د غیر رسمي او رسمي سیمو ترمنځ توپیر له منځه لاړ شي او ټولو هېوادوالو ته یو شان ښاري خدمتونو وړاندې شي.
