ژباړه: نسیمه محمدي
د سینې سرطان نښې چې باید هره ښځه یې وپېژني، ځکه د دې ډول سرطان پر وخت پېژندل، لکه د ځینو نورو سرطانونو په څېر ستاسې د بریا او درملنې چانس زیاتوي او کولای شي ستاسې ژوند وژغوري. د ماموګرافۍ تر سره کول چې په ډېری هېوادونو کې په وړیا توګه په دوره یي ډول تر سره کېږي تر ټولو غوره لار ده او د دې ناروغۍ په لومړي پړاو کې اخته ناروغان، له شتون څخه خبر او د درملنې لپاره ګام اوچتوي مګر دا د دې لامل نه ګرځي چې تاسې د سینې سرطان نښې زده نه کړئ.
د سینې سرطان یو له څرګنده او ښکاره نښو څخه، په سینه کې د یوې غېرې عادي کتلې شتون دی. دا کتله یا غدود کلک او د غېرې منظمه څنډو درلودونکې دی، چې کله لږ څه فشار ورکړئ درد کوي، چې په قوي ګمان د سینې سرطان دی، مګر د سینې سرطان کېدای شي کلک او منظم او ګرد شکل ولري. همدارنګه د یوې کتلې شتون او احساس په صورت کې باید روغتیا پال ته ورشئ. تر څو اړین معاینات تر سره کړي که چېرې د سینې سرطان تایید شو، چټک یې درملنې لپاره اقدام وکړئ.
مګر د سینې سرطان نښې په همدې ځای پای ته نه رسېږي وړاندې نورې نښې نښانې هم درپېژنو.
د سینې د سرطان نښې:
- د ټولې یا د سینې د یوې برخې پړسوب( حتی که کتله هم شتون ونه لري) په سینه کې احساس کړئ.
- د یوې سینې سوزش یا د رنګ بدلون( کله یې رنګ نارنج ته ورته کېږي).
- د سینې د څوکې یا نیپل درد.
- د نیپل دننه تلل.
- د سینې د نیپل او یا یې د پوستکي سوروالی او پېړ والی.
- د سینې څخه د شیدو پرته د موادو ترشح.
ځینې وختونه که د سینې سرطان ونه پېژندل شي، مخکې له دې چې په هغه اندازه غټ شي تر څو یې تاسې احساس کړئ، د تخرګ لاندې او د غاړې هډوکو ته هم پرمختګ کوي. د لمفاوي غدو د پړسوب په صورت کې حتما د سرطان د آزمایښت لپاره ډاکټر ته لاړ شئ.
که څه هم هر یو د سرطان له دې نښو څخه کېدای شي د سرطان پرته لامل ولري، مګر که هغه مو ولیدل، باید یو تکړه روغتیا پال ته مراجعه وکړئ تر څو وڅېړل شي.
لکه څرنګه چې ماموګرافي نشي کولای د سینې هر ډول سرطان تشخیص کړي، ډېره مهمه ده، چې تل د سینې د رنګ بدلون په نظر کې ونیسئ او د سرطان علایمو ته تل دقت وکړئ.